НЗД 4 ОРЛОГЧТОЙ БАЙСНЫГ 6 БОЛГОЖ НЭМЭХ ГЭЖ БАЙНА

Нийслэлийн Засаг дарга 4 орлогчтой ажиллаж байсан. Тэгвэл томилогдоод удаагүй байгаа Засаг дарга С.Амарсайхан зургаан орлогчтой байхаар Засгийн газрын тогтоол гарах гэж байна.

Засгийн газрын 2016 оны 8-р сарын 3-ны өдрийн тогтоолоор НЗДТГ, ЗАА-ны бүтцийг баталсан. Ингэхдээ НЗД хоёр орлогч, хоёр төслийн удирдагчтай байхаар баталсан. Энэ дагуу НЗД-ийн Дэд бүтцийн хөгжлийн асуудал хариуцсан орлогч П.Баярхүү, Ногоон хөгжил, агаарын бохирдлын асуудал хариуцсан орлогч Ж.Батбаясгалан, Гэр хорооллын хөгжил, нийгмийн асуудал хариуцсан төслийн удирдагчаар Ш.Анхмаа, Ядуурлыг бууруулах, хөдөлмөр эрхлэлтийн асуудал хариуцсан төслийн удирдагчаар Д.Энхтөр нарыг томилон ажиллуулж байлаа.

Харин одоо шинээр батлагдах гэж буй нийслэлийн орон тооны бүтцэд Засаг дарга 6 орлогчтой байх ба тодруулбал,

• 1.Хөгжлийн бодлогын асуудал хариуцсан орлогч
• 2.Хүний хөгжил, нийгмийн бодлогын асуудал хариуцсан орлогч
• 3.Хот байгуулалтын асуудал хариуцсан
• 4.Инноваци, технологийн асуудал хариуцсан
• 5.Агаар, орчны бохирдол хариуцсан
• 6.Зам, тээврийн асуудал хариуцсан төслийн удирдагчдыг Засаг даргын орлогчтой дүйцэхүйц түвшинд ажиллуулах хэмээн орон тоо, бүтцийг батлах гэж байна.

Ийнхүү Засаг даргын орлогч нарын тоо нэмэгдэх нь дарга нарын цалин хангамж, жолооч, туслахуудын цалин гэгчлэн нийслэлийн төсөвт тусгагдах юм. Өөрөөр хэлбэл, татварын мөнгө сандал суудал, түүнийг эзэгнэгчдэд зарцуулагдах тогтоол гарах гэж байна.

Тиймээс шинээр томилогдох орлогч нарын нэр ч яригдаж, эхнээсээ тодорхой болж эхэлжээ. Эх сурвалжийн мэдээллээр, С.Амарсайханы хуучин албан тушаал буюу НИТХ-ын даргад нэр дэвшээд, төд удалгүй нэрээ татсан НИТХ-ын төлөөлөгч Ц.Байгалмаа НЗД-ын нэг орлогчоор "очихоор" тохироо хийсэн мэдээлэл байна.