ДАРААГИЙН ЭЭЛЖИЙН ЖДҮ-ЧИН ТАВАН ГИШҮҮНИЙ БҮРЭН ЭРХ ХАВРЫН ЧУУЛГАНААР ХӨНДӨГДӨНӨ

Жижиг, дунд үйлдвэрлэлийг дэмжих сангаас хамаарал бүхий компаниараа зээл авсан УИХ-ын гишүүд, төрийн өндөр албан тушаалтнуудын хэргийг АТГ, ЦЕГ хамтран эрүүгийн хэрэг үүсгэн шалгаж байна. Одоогийн байдлаар УИХ-ын гишүүн Б.Батзориг, Л.Энхболд, Б.Ундармаа, Г.Солтан, Д.Дамба-Очир, нарын хэргийг мөрдөн байцааж дуусаад шүүхрүү шилжүүлэхэд бэлэн болжээ. Эдгээр таван гишүүнийг яллагдагчаар татах тогтоолтой нь танилцуулж гарын үсэг зуруулж дуусгажээ. УИХ-ын гишүүдийн ажлын өрөө, автомашин, гар утсанд нэгжлэг хийж болохгүй байгаа учир санхүүгийн энэ хэргийг мөрдөн байцаах явцад хүндрэл гарч байгааг прокурорын байгууллагаас нуугаагүй. ЖДҮ-ийг дэмжих сангаас зээл авсан 30 орчим гишүүнийг шалгаж байгаа бөгөөд ирэх чуулганы эхэнд дахин таван гишүүний бүрэн эрхийг түдгэлзүүлэх бичгийг УЕПГ-аас УИХ-д хүргүүлэхэд бэлэн болжээ. Харин хэн хэн гэдгийг одоо хэлэх боломжгүй байгаа аж. Ямартаа ч ЖДҮ-гээс зээл авсан нь анхны баримтуудаар тогтоогдож байгаа, мөрдөн байцаах ажиллагаа явуулахад хялбар УИХ-ын гишүүдийн асуудлыг түрүүлж оруулж ирж байгааг албаныхан хэлэв. Эдгээр гишүүдийг шүүхээс гэмт буруутай гэж үзвэл шууд татагдах хуулийн заалттай.