ТУСГАЙ САНГААС ЗЭЭЛ АВСАН ДАРХАН ГУРИЛ ТЭЖЭЭЛ ХХК 11 ТЭРБУМЫН ХЭРГЭЭР АТГ-Т ШАЛГАГДАЖ БАЙНА

Сангийн яамнаас тусгай сангуудад хийсэн шалгалтын үр дүнгээ танилцуулжээ. Бид тусгай сангуудаас зөрчилтэй зээл авч улсад хохирол учруулсан компаниудыг танилцуулж байна. Сангийн яамнаас хийсэн шалгалтаар "Дархан гурил тэжээл" ХХК дараах зөрчлийг гаргажээ.

Үр тариа хадгалах зориулалттай 36.0 мянган тонн багтаамжтай төмөр, бетон хийцийн элеватор шинээр барих төсвийг үндэслэн Монгол Улсын 2014 оны төсвийн тухай хуулийн 2 дугаар хавсралтын 21.1.8-д 2014 онд олгох 8.0 тэрбум төгрөг, 2015 онд санхүүжүүлэх 8.0 тэрбум төгрөгийн төсөв батлагджээ. Тендер шалгаруулалтад "Эм Би инженеринг" ХХК, "Хийц констракшн" ХХК, "Дархан гурил тэжээл" ХК-иуд тендерийн материал авч, Тендер нээхэд нэг оролцогч буюу "Дархан гурил тэжээл" ХК тендер ирүүлсэнээр шалгарсан байна. Гэвч тендерт 2013 оны санхүүгийн тайлангаар 2.1 тэрбум төгрөгийн богино хугацаат өр, 3.1 тэрбум төгрөгийн урт хугацаат зээл, нийт 5.2 тэрбум төгрөгийн өр, төлбөртэй компанийг шалгаруулжээ.

" Дархан гурил тэжээл" ХХК-ийн нийлүүлсэн элеватор нь зориулалтын дагуу ашиглах наад захын шаардлагыг хангахгүйгээс буудай авч хадгалах үйл ажиллагаа явагдахгүй байна. Энэ хүлээн авсан элеватор нь тендерийг шалгаруулахаас өмнө Тариаланг дэмжих сан буудай хадгалуулж байгаад хуучин, буудай шатсанаас хөө тортог үүсч, нян бактери үржсэн, эрүүл ахуй ариун цэврийн наад захын шаардлагыг хангахгүй болсон зэргээс шалтгаалан Мэргэжлийн хяналтын байгууллагаас удаа дараалан "Албан шаардлага" өгч, хорио цээрийн дүгнэлт гаргаж байсан боловч, биелэлт нь хангагдаагүй, эвдэрхий бүрэн бус элеваторыг хүлээлгэн өгсөн, хүлээн авсантай холбоотой байна.

ТЭДСангийн зүгээс Эрүүгийн цагдаагийн газарт уг асуудлаар хандсаны дагуу шалгалтыг явуулж байгаад албан тушаалын гэмт хэргийн холбогдолтой байж болзошгүй гэж үзсэн тул Авлигатай тэмцэх газарт шилжүүлжээ. Авлигатай тэмцэх газар эрүүгийн хэрэг үүсгэн шалгаж байгаа бөгөөд одоогийн байдлаар хөрөнгийн үнэлгээг мэргэжлийн үнэлгээчдээр хийлгэж, 11,240,745,297 төгрөгөөр тогтоолгон, Тариаланг дэмжих сангаас хохирогчийн төлөөлөн нэхэмжлэгч томилуулан ажиллуулж байгаа юм байна.