СЭРЭМЖЛҮҮЛЭГ: БЭЛЭН МӨНГӨГҮЙ ЭМЭГТЭЙЧҮҮДЭД ХУТГА ТУЛГАН АТМ ОРЖ, ДАНСАН ДАХЬ БҮХ МӨНГИЙГ НЬ ДЭЭРЭМДДЭГ БАЙЖЭЭ

ОРОЙН ЦАГААР ГАНЦААРАА ЯВЖ БУЙ ЭМЭГТЭЙЧҮҮДИЙГ ОЛЗОЛДОГ-

Эрүүгийн цагдаагийн албаны Онц хүнд гэмт хэрэгтэй тэмцэх алба хаагчид хоёрдугаар сарын 16-ны өдөр Нийслэл хотын хэмжээнд дээрмийн хэрэг үйлддэг хоёр этгээдийг илрүүлэн баривчилжээ. Тэд шөнө оройн цагаар ганцаараа явж байгаа эмэгтэйчүүдийг машиндаа суулгаж хөл гарыг нь хүлж, хоолойг нь олсоор боож айлган сүрдүүлж, биед байгаа бүх эд зүйл, гар утас бэлэн мөнгийг нь дээрэмдэн авдаг аж. Гэмт хэрэгтнүүд такси барих гэж гар өргөн зогсож буй эмэгтэйчүүдийг суулган, хүний хөлөөс зайдуу очиж дээрэмддэг бөгөөд биедээ бэлэн мөнгөгүй явж байсан эмэгтэйчүүдийг хутга тулган АТМ орж дансны үлдэгдэлд байгаа бүх мөнгийг нь авдаг байжээ.

Уг гэмт хэргийг үйлддэг этгээдүүд болох 24 настай эрэгтэй П, 16 настай А нарыг иргэдийн мэдээлллийн дагуу мөрдөн шалгаж үйлдэл дээр нь илрүүлэн саатуулсан байна. 24 настай П нь урьд өмнө нь танхай болон дээрэмдэх төрлийн гэмт хэрэг үйлдэж удаа дараа ял шийтгэл эдэлж байсан нэгэн. Тэрээр насанд хүрээгүй А-тай хамтран эмэгтэйчүүдийг дээрэмдэх үйлдлээ гурван удаа үйлдсэн хэмээн хүлээгээд байгаа гэдгийг албаныхан мэдээлж байна.

Гэмт этгээдүүд хувийн Приус-30 загварын автомашинаар халтуур хийж байгаа мэт дүр эсгэдэг аж. Мөн эмэгтэйчүүдийг машинд суулгахдаа 24 настай П нь жолоо барьж, 16 настай А нь машины багажинд нуугдаж, хүнгүй газарт очиж зогсоод багаажнаас гарч ирдэг байгаа юм. Цагдаагийн алба хаагчид шалгалтын ажиллагаа явуулж урьдчилсан байдлаар гурван үйлдлийг нь тогтоожээ.

Тухайлбал, Баянгол дүүргийн 16-р хороо "Найман шарга" захын гаднаас 39 настай эмэгтэй Э нь Гандан хүрэхээр такси барьсан. Уг эмэгтэйг машиндаа суулгаж, бэлэн мөнгөгүй байсан тул хутга тулган, айлган сүрдүүлж АТМ руу оруулж, дансан дахь нэг сая 900 мянган төгрөгийн үлдэгдлийг бүгдийг нь дээрэмдэн авсан. Мөн Чингэлтэй дүүргийн хоёрдугаар хороо "Хатан гоёл" салоны үүднээс 51 настай эмэгтэй Г-г суулган хүнгүй газарт очиж зодож айпон 10 маркийн гар утас 150 мянган төгрөгийг дээрэмдсэн байна.

Түүнчлэн гэмт этгээдүүдийн автомашинд Чингэлтэй дүүргийн гуравдугаар хороонд байрлах "Их дэлгүүр"-ийн урдаас гар өргөн 38 настай эмэгтэй Б нь зодож танхайрч гар утсыг нь дээрэмдэн, хүч хэрэглэн картнаас нь 100 мянган төгрөг уншуулан авсан тохиолдлыг илрүүлсэн байна. Гэмт хэргийг үйлдсэн этгээдүүдийг саатуулан шалгалтын ажиллагааг үргэлжлүүлэн явуулж эхэлжээ.

СЭРЭМЖЛҮҮЛЭГ: Цагдаагийн байгууллагаас энэ төрлийн гэмт хэргийн хохирогч болсон эмэгтэйчүүдийг цагдаагийн байгууллагад хандахыг зөвлөж байна. Мөн шөнө оройн цагаар ганцаараа явахгүй байх, хувийн такси унаагаар үйлчлүүлэхдээ анхаарал болгоомжтой байх, автомашины дугаарыг сайтар харах, хүнгүй газраар явахгүй байх зэргээр өөрийн аюулгүй байдлаа хангахыг анхааруулж байна

эх сурвалж: medee.mn