KFC-ИЙН ШИНЖИЛГЭЭНИЙ ХАРИУ ӨНӨӨДӨР ГАРНА

Энэ сарын 8-10-ны хооронд Хан-Уул дүүрэгт байрлах түргэн хоолны "KFC" сүлжээ дэлгүүрийн Зайсан дахь салбараар үйлчлүүлж хоол захиалж идсэн гэх 70 гаруй хүн хордлого авч тэдний 30 гаруй нь халуурах, бөөлжих, суулгах, зовиуртайгаар ХӨСҮТ-д эмчлүүлж байна.

Эдгээрийн 10 нь бага насны хүүхэд аж. Өнгөрсөн баасан гарагийн байдлаар 11 иргэний биеийн байдал өндөр хэмтэйгээр халуурах, бөөлжих, усархаг суулгалтаар олон удаа суулгах зэргээр биеийн байдал нь хүндэвтэр байсан.
Ямартай ч хордсон иргэдийн дийлэнх нь "Найзууд" багц захиалан идсэн ба тухайн өдөр 300 гаруй багц худалдаанд гаргасан гэх мэдээлэл бий.

Тухайн өдөр НМХГ-ынхан дээрх салбараас 52 дээж авчээ. Хоолны дээжээс авсан шинжилгээний эцсийн хариу даваа гарагт буюу өнөөдөр гарна гэсэн мэдээллийг НМХГ-аас өгсөн байгаа бөгөөд хариу гарсны дараа дахин мэдээлэл хийнэ гэсэн юм.