ХАН-УУЛ ДҮҮРГЭЭС ЧОНОТОЙ АНДУУРЧ БАРЬСАН НОХОЙГ ЭЗЭНД НЬ ӨГЛӨӨ

Нийслэлийн Хан-Уул дүүргийн 15 дугаар хорооны нутаг дэвсгэрт энэ сарын 8-нд буюу шинийн 4-ний өдөр "чоно орж ирлээ" гэсэн дуудлагын дагуу цагдаагийн албан хаагчид очсон. Ингээд тухайн "чоно"-ыг хүчлэн барьж авч явсан билээ. Дээрх араатанг МУИС-ийн Биологийн тэнхмээр тодорхойлуулсан байна. Тус тэнхимийнхэн "Өнгө зүсээрээ чонотой төстэй боловч толгой, хоншоор, нүдний өнгө, сарвуу зэргийг үндэслэн нохой болох"-ыг тодорхойлсон байна. Энэ талаар Нийслэлийн Байгаль орчны газрын дарга Э.Баттулга, "Энэ явцад Баянзүрх дүүргийн иргэн Б-ийн зүгээс 2018 оны есдүгээр сард алдсан нохойн зураг нь олон нийтийн сүлжээнд тавигдсаны дагуу манай байгууллагад хандсан юм. Нохойтойгоо авахуулсан зураг, нохойны эзнээ таньж буй байдал, бичгээр гаргасан хүсэлт зэргийг нь үндэслэн сая хүлээлгэн өглөө. Энэ дашрамд энгийн иргэд ялгахад бэрх нөхцөлд олон нийтийн аюулгүй байдлыг хангах зорилгоор дуудлага өгсөн иргэн, мэргэжлийн байгууллагад хүлээлгэн өгсөн цагдаагийн албан хаагчдад талархал илэрхийлье. Ижил төрлийн дуудлага бүрд шуурхай ажиллаж амьтан хамгааллын ажлыг явуулж байх болно" гэж бичжээ