ВАЛЕНТИНААР БОЛЗОХ ХАНШ 15 ДОЛЛАРААС ЭХЭЛНЭ

Шинэ Зеландын иргэн Питер Вилдинг гэх залуу удахгүй болох Гэгээн Валентиний өдрөөр өөрийгөө худалдах зар Фэйсбүүкт тавьжээ. Тухайн өдөр өөртэй нь уулзах хүсэлтэй ганц бие бүсгүйчүүд зар дээр тавьсан найман төрлийн багцаас сонголт хийж, үйлчлүүлэх боломжтой. Үнэ хөлсний хувьд 15 доллараас эхэлж, багцын сонголтоос хамааран нэмэгдэх юм байна. Гэхдээ аль ч багцыг сонгосон үнэ хөлсөө ярилцаж, тохиролцох боломж бас бий гэнэ. Питер 12 настайдаа тархиндаа цус алдаж, амиа алдах дөхсөн. Үүний улмаас багадаа охидтой уулзаж, үерхэж, болзоонд явж чадаагүй. Харин одоо өнгөрсөн хугацаанд алдсан сайхан боломжуудыг нөхөх зорилготой байгаа хэмээн өөрийнхөө үйлчилгээний нарийн учрыг тайлбарлажээ.

Фэйсбүүкийн Taupio Noticeboard хэмээх зарын гурппт тавьсан Питерийн зард хайрын өдрийн төлбөрт болзоо өглөө нэг цаг найзын хувиар зугаалахаас эхлэх юм байна. Энгийн найзын хувиар уулзаад залуу бүсгүйд таалагдвал дахин нэг цаг сунгаж болно. Ингэхдээ үнэ нь хоёр дахин өсч хөтлөлцөх, шоколад хувааж идэх зэрэг үйлчилгээ нэмэгдэх юм байна. Хэрвээ хөлсөө нэмнэ гэвэл хамт усанд сэлэх, бялуу хувааж идэх, дарс уух, МакДональдст уламжлалт маягийн зоог барих, хамтдаа хайрын бэлгэдэл бүхий гэрэл зураг татуулах багцын сонголт бий гэнэ. Зөвхөн хоёулхнаа романтик оройн зоог барихыг хүсвэл хоёр цагийн 45 доллар. Харин эцэг эхтэй нь уулзаж, оройн хоол хамт идэхээр бол 45 доллар, тухайн үед үнсэлцэх хүсэлтэй бол 15 доллар нэмж төлнө. Үйлчлүүлэгч бүсгүй Питерийг дүү нартайгаа тоглуулъя гэвэл нэмэлт хөлс нь 10 доллар болох аж.

"Хайрын шувуухайнууд" гэх дөрвөн цагийн багцыг сонирхож байгаа бол 75 доллар төлөхөд хангалттай. Мөн энэ хугацаанд олон нийтийн газар хөтлөлцөж алхах, үнсэлцэх хүсэлтэй бол 20 доллар нэмж төлөх юм байна. Нэг шөнийг хамт өнгөрөөх 15 цагийн багц нь 150 долларын үнэтэй. Үүнд, гэрээс нь очиж авах, оройн хоол идэх, Ниссан Бассара загварын машинаар шөнийн зугаалганд явах, тэврэлдэх, үнсэлцэх зэрэг үйлчилгээ багтана.

Питер Вилдинг энэ мэт үйлчилгээг санал болгож байгаа ч насны хязгаар заажээ. Тэр зөвхөн 22-36 насны эмэгтэйчүүдэд дээрхи найман төрлийн багц үйлчигээгээ санал болгож байгаа юм байна.