ЭЭЖИЙНХЭЭ ТЭТГЭВРИЙГ АВАХ ГЭЖ ЦОГЦСЫГ НЬ ГУДСАН ДООР НУУЖЭЭ

Испанийн Коста Дель Сол хотод амьдардаг 71 настай эмэгтэйн занданшсан цогцсыг орных нь гудас доороос олсон талаар орон нутгийн хэвлэлээр шуугиж байна. Их Британийн иргэн Валери Бутройд тус хотод охин болон зээ охиныхоо хамт амьдардаг байжээ. Талийгч эмэгтэйн охин Луйз Бутройдын мэдүүлснээр ээж нь өнгөрсөн оны гуравдугаар сарын 21-ний өдөр буюу Их Британийн Ээжүүдийн баярын маргааш амьсгал хураасан аж. Орон нутгийн иргэний хамгааллынхан зээ охиных нь өгсөн дуудлагын дагуу хэргийн газар очиж, үзлэг хийхэд талийгч эмэгтэй бүрэн хувцастайгаа, гудас болон орны доод хатуулганы завсар хавчуулагдсан байдалтай олджээ. Тэд хөршүүдээс нь мэдүүлэг авахад өнгөрсөн зун нэг хэсэг өмхий үнэр ханхалсан. Гэхдээ тухайн үед тэжээвэр амьтдаас нь болж, эвгүй үнэр гарч байгаа байх гэж бодсон гэдгээ учирлажээ. Валери Бутройдын зээ охин нь өгсөн мэдүүлэгтээ эмээгийнх нь хуучин хамтрагч анх цогцсыг нь гудсан доороос олсон гэжээ. Задлан шинжилгээний хүрээлэнгийн шинжээчид цогцост үзлэг хийхэд 71 настай эмгэн байгалийн жамаар өөд болсон байна. Гэхдээ түүний охин нь ээжийнхээ нас барсан талаар цагдаагийн газарт мэдээлэлгүй өдий хүрсэн нь санхүүгийн асуудалтай холбоотой. Охин нь ээжийнхээ тэтгэврийг үргэлжлүүлэн авах санаархлаар ийм алхам хийсэн байж болзошгүй гэж Испанийн прокурорын газраас таамаглаж байгаа. Одоогоор хэргийн үнэн мөнийг тогтоох шалгалт явуулж буй аж.