МИШЭЛЬ ОБАМА, ЛЕЙДИ ГАГА, АЛИШИА КИЙС НАР ГРЭММИ ДЭЭР ГЭНЭТИЙН БЭЛЭГ БАРИВ

Грэммигийн 61 дэх удаагийн шагнал гардуулах ёслолын ажиллагаанд АНУ-ын Тэргүүн хатагтай асан Мишэль Обама хүрэлцэн ирж, гэнэтийн бэлэг барьжээ. Өдгөө 55 настай түүний хамт Лейди Гага, Жада Пинкетт Смит, Алишиа Кийс нарын хүчирхэг эмэгтэйчүүдийн төлөөлөл тайзнаа гарч ирсэн байна. Алишиа Кийс, Мишэль Обама нар маш найз нөхдийн дотно харилцаатай бөгөөд Б.Обамаг Ерөнхийлөгч байх хугацаанд хэд хэдэн удаа Цагаан ордон дахь арга хэмжээнд уригдан оролцож байсан юм. Мишэль Обама тайзан дээр хэлсэн үгэндээ "Хөгжим бол өнгөрсөн арваад жилийн хугацаанд намайг хөдөлгөгч гол хүч болж байлаа. Надад сэтгэл санаа, үзэл бодлоо илэрхийлэх гол хэрэгсэл минь болсон юм. Каунтри, реп, рок гэж ангилалгүй бүхий л хөгжим хүн төрөлхтөнийг баяр гуниг, зовлон жаргалаа бусадтай хуваалцаж, бие биенийхээ дотоод сэтгэлийг уудлан сонсоход тусладаг дуу хоолой" хэмээн цохон тэмдэглэсэн байна.

Эмэгтэйчүүдийн оролцоог ойшоож үздэггүй гэх шүүмжлэл дагуулдаг байсан Грэммигийн наадам энэ жил эмэгтэй дуучдыг дэмжихэд анхаарал хандуулсан нь шагнал хүртсэн уран бүтээлчдээс тодорхой харагдана. Тухайлбал Дуа Липа "Шинэ шилдэг уран бүтээлч" шагналыг хүртсэн бол Кэйси Масгрэйвэс анх удаа "Оны шилдэг цомог" шагналыг авсан эмэгтэйгээр тодорчээ. Түүнээс гадна, Чайлдиш Гамбино дөрвөн төрөлд, Лэйди Гага гурван төрөлд нэр дэвшин ялсан юм. Грэммигийн шагнал гардуулах хорооны Ерөнхийлөгч Нейль Портнау өмнөх жилүүдэд эмэгтэйчүүдийн оролцоо, тэдний ур чадварыг дутуу үнэлж байсандаа уучлалт гуйж, цаашдаа тэдний дуу хоолойг үнэлж, тууштай дэмжлэг үзүүлэхэд анхаарал хандуулахаа амласан байна.