ЭНЭТХЭГ, ХЯТАДЫН ХАРИЛЦАА ХҮЙТРЭХ ХАНДЛАГАТАЙ БОЛОВ

Энэтхэгийн Ерөнхий сайд Нарендра Моди өнгөрсөн бямба гарагт тус улсын зүүн хойд хэсгийн Аруначал Прадешт айлчилсан нь "тууштай эсэргүүцэл үзүүлсэн хэрэг" гэж үзэж буйгаа БНХАУ-ын Гадаад хэргийн яам мэдэгдлээ. Уг нь Н.Модигийн тус нутагт айлчилсан нь ирэх тавдугаар сард болох олон нийтийн сонгуульд Бхаратия Жаната намыг дэмжихийг сонгогч түмэнд уриалах байлаа. Гэвч түүний ийнхүү хоёр орны хилийн маргаантай бүсэд айлчилсан нь Бээжингийн дургүйцлийг хүргэж, талуудын харилцаа хүйтрэх хандлагатай боллоо гэж олон улсын ажиглагчид анхааруулж эхэлжээ. Хятадын Гадаад хэргийн яамнаас гаргасан мэдэгдэлдээ "Хоёр орны харилцааг сайжруулах тал дээр Энэтхэгийн Засгийн газар БНХАУ-ын ашиг сонирхол, ач холбогдлыг харгалзан үзэж, хилийн маргаантай зурвас дахь асуудлыг дэврээж, харилцаанд сэв суулгахгүй байхад анхаарууштай" хэмээн сануулсан байна. Харин үүний хариуд Энэтхэгийн Гадаад хэргийн яамны төлөөлөгч мэдэгдэл хийж, "Аруначал Прадеш нь Энэтхэгийн салшгүй нэг хэсэг мөн учраас манай удирдагчид улс орныхоо бусад нутаг дэвсгэрт чөлөөтэй зорчдогийн адил тус бүсэд ч гэсэн цагийн цагт айлчилсан хэвээрээ байх учраас БНХАУ-ын талаас хэт эмзэглэн хүлээж авах, түүгээр шатаглан элдэв маргаан өдөөхгүй байх нь чухал" хэмээн хатуухан хариу барьжээ. Энэтхэг, Хятадын уулархаг бүсийн газар нутгийн маргааны улмаас 1962 онд цэрэг зэвсэг хөдөлгөхдөө хүрснээс хойш талууд харилцаагаа эерүүлэх тал дээр олон арван арга хэмжээ авч хэрэгжүүлсэн байдаг. Гэхдээ энэ хугацаанд хэд хэдэн маргаан үүссэнээс хамгийн сүүлийн жишээг нь дурдахад 2017 онд Гималайн уулс дахь хилийн зурвасыг булаалцалдан хоёр талын цэргүүд гал нээсэн удаатай. Нарендра Моди, Ши Жинпин нар өнгөрсөн онд нэг бус удаа уулзаж, худалдааны замаар хамтын ажиллагаагаа зузаатгах тал дээр санал бодол солилцож, олон талын тохиролцоонд хүрсэн. Гэвч Энэтхэгийн Засгийн газрын болон худалдааны салбарын төлөөлөгчид энэ тал дээр хэт хойрго хандсан хэвээр байгаа юм.