ОРОСТ ЦАГААН БААВГАЙН ДАЙРАЛТЫН УЛМААС ОНЦ БАЙДАЛ ЗАРЛАЖЭЭ

ОХУ-ын алслагдсан хойд нутаг буюу Арктикийн бүсэд орших тосгод руу олон тооны цагаан баавгай дайрч түйвээн онц байдал зарлахад хүргэжээ. Новая землья хэмээх Зөвлөлтийн үед цөмийн зэвсгийн туршилт хийдэг байсан газрын ойролцоохь тосгон болон түүний эргэн тойрны нутагт онц байдал зарласан талаар Итар Тасс агентлаг мэдээлэв. Цагаан баавгайнууд бөөн бөөнөөрөө тосгон руу дайрч иргэдэд халдах, орон сууцны орц гарцыг хаах зэргээр зэрлэг авирласан ч ховор төрлийн амьтдыг буудах эсвэл ямар нэгэн байдлаар халдсан тохиолдолд хуулийн хариуцлага хүлээлгэхийг эрх баргчдын зүгээс тогсоны оршин суугчдад анхааруулсаар байгаа юм байна. Орон нутгийн захиргааны ажилтан Александр Миняев "Иргэд гадагшаа гарахаас ч айж, өдөр тутмын амьдрал хямарч дууслаа" хэмээн хэвлэлд ярьжээ. Цагаан баавгайн дайралтаас болоод хүүхдүүд ч сургууль цэцэрлэгтээ ч явж чадахаа байсан гэнэ. Белушя Губа хэмээх тосгонд 52 цагаан баавгай дайран орж, орон сууц, албан байгууллагуудын байранд нэвтэрч хүмүүс рүү дайрсан хэрэг ч бүртгэгджээ. Дээр дурдсан суурин газарт олон жил амьдарсан иргэд энэ удаагийнх шиг ийм олон тооны цагаан баавгай дайрсан тохиолдол нэг ч гарч байгаагүй гэж учирлаж байгаа юм. Амьтан хамгаалагчдын тайлбарлаж буйгаар цагаан баавгайн энэ дайралт нь хойд мөсөн далай орчмын цаг уурын өөрчлөлт, хүнс тэжээлийн олдоц зэргээс шалтгаалан зэрлэг амьтад хүний амьдардаг бүс рүү нэвтэрсэн байж болзошгүй гэв. Албаныхны зүгээр цагаан баавгайнуудыг нэг бүрчлэн барьж, зэрлэг байгальд буцаан аваачих арга хэмжээг авч дуустал онц байдал хүчинтэй үргэлжлэх юм байна.