БНСУ АМЕРИК ЦЭРГҮҮДИЙН ЦАЛИНГ НЭМЭХЭЭР БОЛЖЭЭ

АНУ-ын цэргийн баазыг Солонгосын хойгт байрлуулахын тулд шаардлагатай зардлыг нэмэх тохиролцоонд БНСУ-ын эрх баригчид зөвшөөрч хоёрдугаар сарын 10-ны өдөр гэрээнд гарын үсэг зурсан байна. Ассошэйтэд Пресс агентлагийн дамжуулснаар Сөүл өмнөх жилүүдэд америк цэргүүдийн зардалд 830 сая доллар төсөвлөдөг байсан бол 2019 онд 94 сая доллараар нэмэгдүүлж, 924 сая долларт хүргэхээр болж байгаа нь энэ юм. Америкийн Ерөнхийлөгч Дональд Трамп "Америк цэргүүдийг Солонгосын хойгт байлгахын тулд Өмнөд Солонгосын талаас илүү их хувь нэмэр оруулах ёстой" гэсэн нь дээрхи гэрээг байгуулахад хүчтэй нөлөөлсөн хэмээн учир мэдэх хүмүүс тайлбарлалаа. Хэдийгээр Өмнөдийн эрх баригчид гэрээнд гарын үсэг зурсан боловч парламентаар хэлэлцүүлж, олонхийн дэмжлэг авах шаардлагатай аж. Харилцан хариуцлага үүрэх зориулалттай энэ төрлийн гэрээг өмнө нь олон жилийн хугацаатай байгуулдаг байсан бол энэ удаагийн шинэ тохиролцоо бүхий гэрээг ганцхан жилийн хугацаатай байгуулж байгаагаараа ялгаатай. БНСУ-ын Гадаад хэргийн сайн Кан Кюн шинэ тохиролцоог хэтийн төлөв сайтай ч зарим нэг тал дээр хойш ухарсан алхам боллоо хэмээн онцолжээ. Түүний энэ үгийг Сөүл Вашингтоны өмнө хэт дуулгавартай байгаа байдлаар нь тайлбарлаж болно гэж олон улсын ажиглагчид бичсэн байна. Дональд Трамп энэ сарын эхээр СиБиЭс телевизэд ярилцлага өгөхдөө аливаа улс орон америк цэргүүдийг нутагтаа байлгаж, аюулгүй байдлаа хангуулахын тулд өмнөхөөсөө их хувь нэмэр оруулах ёстой. Гэхдээ мэдээж хэрэг маш үнэтэй тусна гэж ярьж байсан юм. Мөн энэхүү шинэ тохиролцоо нь энэ сарын 27-28-ны өдөр Вьетнамд болох АНУ, БНАСАУ-ын удирдагчдын уулзалтын өмнөхөн хийгдсэнээрээ онцлогтой бөгөөд бүс нутгийн аюулгүй байдлыг найдвартай хамгаалахад чиглэж байна гэж албаныхан үзэж буй. Өмнөд Солонгосын Ерөнхийлөгч Мүн Жэ Иний хувьд Д.Трамптай байнгын холбоотой байдаг ойрын хамтрагчдынх нь нэг юм.