НОХОЙН ГӨЛӨГНИЙ ХЭВЛИЙД ГЕРОИН НУУЖ, ХИЛ ДАВУУЛАХЫГ ЗАВДСАН ХЭРЭГ ГАРЛАА

Нохойн гөлөг ашиглан Колумбаас АНУ-ын хилээр героин гаргахыг завдсан малын эмч пүрэв гарагт баригдаж, зургаан жил хорих ялаар шийтгүүлжээ. Андрес Лопез Элорез гэх 39 настай эр удаа дараагийн давтан үйлдэлтэй гэв. Өмнө нь буюу 2018 оны есдүгээр сард АНУ-ын хилээр хязгаарлагдмал эм бэлдмэл нэвтрүүлсэн хэрэгт нэр холбогдсон ч гэм буруугүй хэмээн өнгөрсөн юм байна. Малын эмчийн мэргэжлийнхээ давуу талыг ашиглан хэд хэдэн нохойн гөлөгний гэдэс дотор героин хэмээх хар тамхи нууж, хилээр давуулахыг завдсан нь цаашдаа хил гаалиар тэжээвэр амьтан нэвтрэх үед хатуу хяналтад авч байх шаардлагатайг анхааруулсан явдал боллоо хэмээн Америкийн Нью-Йорк хотын зүүн дүүргийн хуульч Ричард Донохю ярьсан байгаа юм. Гэмт этгээд 2015 оны гуравдугаар сард шингэн хэлбэрийн героинийг нохойн гөлөгний хэвлийд шахан нууж, Испаниас АНУ-руу нэвтрүүлэх гэж байсан. Хар тамхины бүлэглэлийнхэн хил давуулсан амьтнаас героинийг нь гаргаж авах үед бүгд үхдэг аж. Мөн 2005 онд Элорезийн Колумб улсын Медилин дахь малын эмнэлэгт явуулсан шалгалтаар хоёр кг орчим героинийг зургаан амьд гөлөгний биед мэс заслын аргаар нуусан байхыг олж илрүүлсэн байна