Ц.НЯМДОРЖ: АМИА АЛДСАН ЦЭРГИЙН АСУУДЛААР ЭХЛЭЭД ОХУ ШАЛГАНА

Hэгдүгээр сарын 30-ны өдөр Увс аймгийн Баруунтуруун суман дахь 0311-р ангид алба хааж байсан цэрэг сумтай буугаа үүрэн оргосон талаар бид өмнө нь мэдээлсэн. Түүнийг эрэн хайх ажиллагааны үеэр ОХУ-ын хил давсан болох нь тогтоогдсон юм. Тэгвэл өнөөдөр эх сурвалжийн мэдээлж буйгаар цэрэг эр хил даван явж байхдаа ОХУ-ын хилчдэд баригдаж, энэ үедээ өөрийн амийг егүүтгэсэн гэх мэдээлэл байна.Энэ талаар Хил хамгаалах ерөнхий газраас тодруулахад: “ОХУ-ын нутаг дэвсгэрт шалгаж байгаа учраас манайхаас ямар нэгэн мэдээлэл өгөх боломжгүй" гэсэн хариу өгөв. Мөн 0311-р ангийн Штабын даргаас лавлахад “мэдээлэл өгөх боломжгүй байна" хэмээлээ. Харин Хуульзүй, дотоод хэргийн сайд Ц.Нямдорж "Оросын нутаг дэвсгэрт гарсан хэрэг учраас Оросын хуулийн байгууллага шалгана" гэсэн мэдээллийг өглөө.