ФЭЙСБҮҮК ИРАНТАЙ ХОЛБООТОЙ 783 ХАЯГИЙГ УСТГАЖЭЭ

Байж боломгүй үйлдэл гаргасан гэдэг шалтгаанаар Иран улстай холбоотой 783 хаягийг устгасан талаар Фэйсбүүк компани мэдээлжээ. Тэдгээр хуудас нь 20 гаруй улсад идэвхитэй үйл ажиллагаа явуулж, Иран улстай холбоотой таагүй, хуурамч, ёс зүйд үл нийцэх мэдээллийг тараадаг байсан аж. Хаягийг эзэмшигчид нь өөрсдийгөө орон нутгийн иргэд гэж мэдэгддэг ч үнэндээ зохиомол нэр ашигласан хуурамч хаяг болох нь тогтоогдсон байна. Фэйсбүүкээс гаргасан мэдэгдлээс харахад дээрхи хуурамч хаягууд нь Афганистан, Албани, Алжир, Египет, Франц, Герман, Энэтхэг, Ливи, Мексик, Морокко, Пакистан, Катар, Сауди Араб, Серби, Өмнөд Африк, Испани, Судан, Тунис, АНУ зэрэг лалын шашинт иргэд бүхий орнуудад гол төлөв ажиллаж, Израиль, Палестиний харилцаа зэрэг олон улсын эмзэг сэдэв хөндөж, дэлхий дахинд буруу ойлголт төрүүлэхийг тогтмол завддаг байсан гэнэ.

Фэйсбүүкийн 262 хуудас, 356 хувь хүний хаяг, гурван бүлэг, Инстаграмийн 162 хаяг нийтдээ хоёр сая дагалдагчтай бөгөөд 2010 оноос хойш идэвхитэй үйл ажиллагаа явуулж, зар сурталчилгаандаа 30 мянга гаруй ам.доллар зарцуулсан байжээ