“МОНГОЛ АЛТАЙН БАРАГШУН” ХХК-ИЙН ҮЙЛ АЖИЛЛАГАА ХЭВИЙН ҮРГЭЛЖИЛЖ БАЙНА

Нийслэлийн мэргэжлийн хяналтын шинжээчид нэгдүгээр сарын 30-ны өдрийн 15:00 цагийн орчимд компанид шалгалтаар иржээ. Улмаар доод давхрын агуулах, лабораторийн үйл ажиллагаатай танилцаж, бүтээгдэхүүнийг ч шинжилсэн байна. Шалгалтаар зарим нэг зөрчил илэрсэн гэдгийг хэлсэн ч компанийн үйл ажиллагааг түр зогсоох тухай ямар нэгэн үг, өгүүлбэр хэлээгүй аж.Мэргэжлийн хяналтынхан ирэхдээ хоёр төрлийн бүтээгдэхүүнийг албан ёсоор бүртгүүлэлгүйгээр худалдаалсан, шаардлага хангаагүй орчинд үйл ажиллагаа явуулсан гэх үндэслэлийг тайлбарласан ч ямар нэгэн байдлаар түр хаах тухай зүйл хэлээгүй байна. Хугацаат үүрэг даалгавар ч өгөөгүй аж. Албан ёсоор бүртгүүлээгүй гэж үзсэн бүтээгдэхүүний нэг нь барагшунтай наалт, нөгөө нь тосон түрхлэг байжээ. Уг хоёр бүтээгдэхүүний тухайд анхан шатны шинжилгээгээр сөрөг нөлөөгүй, хэрэглээнд нэвтрүүлж болно гэсэн дүгнэлт гарчээ. Мэдээлэл цацагдсанаас хойш борлуулалт 0 зогсолт хийж, харилцаатай бүх байгууллагууд нь бүтээгдэхүүнээ буцаах болсон байна. Хүргэлтэд явдаг машинууд ч буцаалт хийсээр өнөөдрийг дуусгаж байгаа гэв.“Тухайн үедээ үйлдвэрийг хаана гэсэн шийдвэр хэлээгүй. Цэвэршүүлсэн барагшуны үйлдвэрлэл явуулж болно гэж хэлж байсан. Харин өчигдөр өглөө прокурорын тушаалтай орж ирсэн. Үнэхээр юу болж байгааг бид нар ч ойлгоогүй” гэж "Монгол Алтайн барагшун" компанийн борлуулалтын менежер Ж.Мягмардорж ярьсан юм