ТУРК УЛСАД ДАХИН ХОРИГ АРГА ХЭМЖЭЭ АВЧ МАГАДГҮЙ

Улс төрийн гүн хямралтай тулгарсан Венесуэлийн Ерөнхийлөгч Николас Мадурод байнгын дэмжлэг үзүүлдэг Туркийн Ерөнхийлөгч Режип Таип Эрдоган хоёр орны хоорондын алтны худалдааг өргөжүүлэх бодлого баримталдаг. Гэхдээ Туркийн тал Венесуэлиэс худалдаж авдаг алтаа Иран руу гаргадаг байж болзошгүй хэмээн сэжиглэж буй тул энэ мэт үйлдлээ даруй зогсоохгүй бол нэмэлт хориг арга хэмжээ авна гэж АНУ-ын талаас анхааруулжээ. Каракас, Истамбулын хооронд хийх алтны худалдаа улам өргөжиж буй. Тухайлбал өнгөрсөн оны байдлаар л гэхэд 900 сая ам.долларын өртөгтэй алтыг Венесуэлиэс Туркт нийлүүлсэн байна. Туркт ирсэн алтыг дахин цэвэршүүлээд Венесуэль руу буцаасан гэх ч Венесуэлээс дахин гадагшаа экспортолсон талаар ямар ч сураг ажиг байдаггүй аж. Тиймээс, Венесуэлиэс гарсан алтыг Туркээр дамжуулан Иран руу нийлүүлдэг байж болзошгүй учраас АНУ-аас тус улсын эсрэг авсан хориг арга хэмжээг зөрчлөө хэмээн Вашингтон тайлбарлав. Зарим эх сурвалжийн мэдээллээр дээр дурдсан алтыг Орос, Арабын Эмират улсад нийлүүлсэн байх магадлал өндөр гэж учир мэдэх албаныхан мэдээлжээ