АНУ ОХУ-ТАЙ БАЙГУУЛСАН ЗЭВСГИЙН ХЯНАЛТЫН ГЭРЭЭНЭЭС ГАРНА

Хүйтэн дайн дууссанаас хойш Европын аюулгүй байдлыг хамгаалахад гол үүрэг гүйцэтгэж байдаг зэвсгийн хяналтын гэрээнээс АНУ гарах гэж байгаа талаар эрх бүхий албан тушаалтнууд, дипломат ажилтнууд мэдээлсэн байна. Олон улсын хэвлэл мэдээллүүдийн дамжуулснаар АНУ-ын Төрийн нарийн бичгийн дарга Майк Помпео өнөөдөр энэ талаар мэдээлэх гэж байгаа юм байна. АНУ, ОХУ болон Европын орнуудын хооронд байгуулсан Дунд зайны тусгалтай цөмийн хүчийг хязгаарлах гэрээнээс гарах тухай асуудлыг Америкийн Ерөнхийлөгч Дональд Трамп ахлах зөвлөхүүдтэйгээ хэдэн сарын өмнөөс ярьж буй. Тэдний тайлбарлаж байгаагаар Москва 2014 оноос хойш дээрхи гэрээг удаа дараа ноцтой зөрчсөн гэнэ. Учир нь Оросын нутагт 800-5500 орчим км-ийн тусгалтай, хуурай газраас харвагч цөмийн цэнэгт хошуутай пуужингууд нь одоо ч хөрш зэргэлдээ Европын орнуудад заналхийлэх аюултай гэж Вашингтоноос тайлбарлаж байгаа юм. Харин олон улсын ажиглагчдын үзэж буйгаар Вашингтон эл гэрээнээс гарсан тохиолдолд Москва хийгээд Европын орнууд болон бусад орнуудын хооронд дахин зэвсгийн асар хүчтэй өрсөлдөөн гарна гэж сэрэмжлүүлжээ.