Д.ЭРДЭНЭБАТ: УИХ-ЫН ДАРГЫГ ОГЦРУУЛАХ НЬ МАН-ЫН АСУУДАЛ

УИХ дахь АН-ын бүлгийн хуралдаан өндөрлөлөө. Тус бүлгийн хуралдааны талаар УИХ дахь АН-ын бүлгийн дарга мэдээлэл хийлээ. Тэрбээр:

-Өнгөрсөн долоо хоногт АН-ын бүлэг шийдвэр гаргаж, "УИХ өөрөө тарж, ээлжит сонгуулийг яаралтай зарлах" тогтоолын төсөл боловсруулж, гарын үсэг цуглуулж эхэлсэн. Өнөөдрийн байдлаар 14 гишүүн гарын үсэг зурсан байна. УИХ-ын үйл ажиллагаа цаашаа явахад хүндрэл үүссэнийг нийгэм харж байгаа. Тийм учраас энэ хавар УИХ-ыг тарааж, яаралтай ээлжит бус сонгуулийг зарлах хэрэгтэй.

Өнөөдрийн тухайд гишүүдийн үл ойлголцол, бие биенээ гүтгэх үзэгдэл хэрээс хэтэрч байгаа. Тиймээс өнөөдөр АН-ын бүлэг байр сууриа ярилцлаа.

УИХ-ын тухай хуульд өөрчлөлт орж, энэ сарын 25-наас эхэлж хэрэгжинэ. Одоо УИХ-ын даргыг чөлөөлөх гарын үсэг цуглуулах үйл ажиллагаа явуулж эхэлж байна. Ингэхдээ гишүүд өөрсдийн итгэл үнэмшлээр зурах ёстой.

АН-ын бүлэг УИХ тарж, ээлжит бус сонгуулийг явуулах нь зүйтэй гэсэн байр суурьтай байгаа. Магадгүй бид эцсийн удаа гарын үсэг зурсан байх. Дахиад ямар нэг зүйлд гарын үсэг зурахгүй. УИХ-ын даргыг огцруулах бичигт гарын үсэг зурах нь МАН-ын асуудал. УИХ-ын даргыг огцруулах асуудал хуулийн хүрээнд явж байгаа нь зүйтэй. Олон нийтийн дэмжлэг УИХ-ын даргад муу байгаа. Бид байр сууриа дахин нотолж байна.

УИХ хуулийн хугацаанд хоёрдугаар сарын 10-нд завсарлах ёстой. Хэрвээ УИХ-ын даргыг огцруулах асуудал сунжирвал УИХ-ын ээлжит бус чуулганыг зарлах ёстой гэсэн байр суурин дээр байна хэмээлээ. УИХ дахь АН-ын бүлгийн дарга Д.Эрдэнэбат мэдээлэл хийснийхээ дараа сэтгүүлчдийн асуултад хариулав.

-АН УИХ-ын даргыг чөлөөлөх бичигт гарын үсэг зурахгүй гэж ойлгож болох уу?

-АН-ын гарын сүүлийн гарын үсэг бол "УИХ тарж, УИХ-ын ээлжит бус сонгуулийг явуулах". АН-ын бүлэг дахиад өөр зүйлд гарын үсэг зурахгүй.

-УИХ-ын гишүүн Л.Болдын асуудал хэрхэн харж байна вэ?

-УИХ-ын гишүүн өнөөдрийг хүртэл АН-ын бүлгийн гишүүн байгаа. АН-аас нэр дэвшсэн. АН-ын Үндсэн дүрмийн дагуу өргөдлөө бичих ёстой. Саяхан Л.Болд гишүүн Үндсэн дүрмийн хүрээнд өргөдлөө өгсөн байна. Үндсэн дүрмийн хүрээнд Л.Болд гишүүнийг чөлөөлвөл, УИХ дахь АН-ын бүлгээс чөлөөлнө.

-АН-ын бүлэг ээлжит бус чуулган зарлах ёстой гэж үзэж байна уу?

-Манай намын бүлэг амармааргүй байна. Зөвхөн 2019 оны улсын төсвийг л баталлаа. Хоёр сайдын асуудал шйидэгдээгүй. Тийм учраас ээлжит бус чуулган хуралдуулах ёстой.