ПРОКУРОРООС МАК ЗЭРЭГ КОМПАНИУДАД МЭДЭГДЭЛ ХҮРГҮҮЛЛЭЭ

Дорнод аймгийн Прокурорын газрын IV улирлын үйл ажиллагааны төлөвлөгөөнд тусгагдсаны дагуу Дорнод аймгийн нутаг дэвсгэрт уул уурхайн чиглэлээр үйл ажиллагаа явуулж буй компаниудаас 2018 онд гэмт хэрэг, зөрчлөөс урьдчилан сэргийлэх чиглэлээр зохион байгуулсан ажлыг шалган зааварчилах, ажилтны хууль, эрх зүйн мэдлэг, мэдээллийг дээшлүүлэх, үйлдэгдэж буй гэмт хэрэг, зөрчлийн шалтгаан нөхцлийг арилгуулах зорилгоор аймгийн ерөнхий прокурорын баталсан удирдамжаар 2018 оны 11 дүгээр сарын 29-ний өдрөөс мөн оны 12 дугаар сарын 20-ны өдөр хүртэл хугацаанд шалгалтыг явуулж дүнг нэгтгэлээ. Шалгалтанд тус аймгийн 4 суманд үйл ажиллагаа явуулж байгаа "Адуунчулуун ХХК", "МАК ХХК", Бүгд Найрамдах Хятад Ард улсын хөрөнгө оруулалттай "Петро чайна дачин тамсаг ХХК"-ны тосон уулын бүтээгдэхүүн угаах 19 дүгээр талбай, үйлдвэрлэлийн баазын 21 дүгээр талбай, "Шинь Шинь ХХК"-ниуд хамрагджээ. Монгол Улсын Гэмт хэргээс урьдчилан сэргийлэх тухай хууль болон бусад хууль тогтоомжоор хүлээлгэсэн 6 заалт бүхий шалгуураар шалгахад, тус компаний удирдлагуудаас өөрийн компани болон ажилтнуудаас үйлдсэн эрүүгийн гэмт хэрэг, зөрчлийн талаар мэддэггүй, гэмт хэрэг, зөрчлөөс урьдчилан сэргийлэх төлөвлөгөөгүй, компани дотооддоо болон үйл ажиллагаа явуулж байгаа хүрээндээ гэмт хэрэг, зөрчил гарч байгаа шалтгаан нөхцлийг арилгахад чиглэсэн үр дүнтэй, тодорхой ажил, арга хэмжээг авч ажиллаагүй, мэргэжлийн байгууллага албан тушаалтнуудын оролцоотойгоор ажилтнууддаа гэмт хэрэг, зөрчлөөс урьдчилан сэргийлэх, шинээр батлагдсан хууль тогтоомж болон шаардлагатай бусад сургалт, сурталчилгаа, мэдээллийг өгч ажиллах байдал, материалжуулалт хангалтгүйзэрэг зөрчил дутагдал илэрсэн байна. Иймд шалгалтын дүнг нэгтгэн дүгнэж, дээрх 5 уурхайд гэмт хэргээс урьдчилан сэргийлэх ажил зохион байгуулах талаар хийх ажлыг тодорхой дурьдсан "прокурорын мэдэгдэл" бичиж хүргүүлсэн бөгөөд биелэлтийг нь 2018 оны I улиралд дахин шалгахаар болжээ.