ХОТЫН ДАРГААР С.АМАРСАЙХАНЫГ ТОМИЛОХ ЭСЭХИЙГ ХЭЛЭЛЦЭНЭ

НИТХ өнгөрсөн долоо хоногийн баасан гаригт хуралдаж, хотын даргын томилгоог хэлэлцэх учиртай байсан. Гэвч НИТХ дахь МАН-ын бүлгийн гишүүдийн ирц бүрдээгүйн улмаас АН-ын бүлгээс хурлыг хойшлуулах санал гаргасан юм.Ингэснээр өнөөдөр 11:00 цагаас НИТХ-аар хотын даргаар С.Амарсайханыг томилох эсэх асуудлыг хэлэлцэхээр товлоод байна.

Нийслэлийн иргэдийн төлөөлөгчийн хурал эхлэхээс өмнө НИТХ дахь МАН-ын бүлэг хуралдана гэсэн чигтэй байгаа юм. Өнгөрсөн долоо хоногийн баасан гаригт Нийслэлийн МАН-ын тэргүүлэгчид хуралдаж, Баянзүрх дүүргийн засаг дарга асан Б.Мөнхбаатар, НИТХ-ын дарга С.Амарсайхан нарын хэнийг нь хотын даргад дэвшүүлэх асуудлыг хэлэлцсэн. Энэ үеэр Нийслэлийн МАН-н тэргүүлэгчдийн 9 нь С.Амарсайханыг, 5 нь Б.Мөнхбаатарыг дэмжсэн байдаг.

Нийслэлийн МАН-ын тэргүүүлэгчид хуралдсаны дараа МАН-ын Удирдах зөвлөл хуралдаж, С.Амарсайханыг хотын даргад нэр дэвшихийг дэмжсэн. Уг асуудлыг НИТХ дахь МАН-ын бүлэг дотооддоо хэлэлцээгүй билээ. Тиймээс өнөөдөр хуралдаж, байр сууриа нэгтгэх читэй байгаа аж.

Одоогоор заалнаас Б.Мөнхбаатар нэрээ дэвшүүлэх эсэх нь тодорхойгүй байгаа юм. Мөнхүү НИТХ дахь Ц.Сандуйгийн фракцийн 10 гаруй төлөөлөгчид хэнд саналаа өгөх нь тодорхойгүй байна. Тэдний ихэнх баасан гаригийн НИТХ-д ирээгүй билээ. Түүнчлэн сөрөг хүчний 11 төлөөлөгч С.Амарсайханыг дэмжих эсэх дээр хэвлэлийнхэнд ямар нэгэн байр суурь илэрхийлээгүй байгаа юм