МАН ХААЛТТАЙ, ШИРҮҮХЭН ХУРАЛДАХ БОЛОЛТОЙ

МАН-ын Бага хурал өнөөдөр хуралдана. Бага хурлаар Бага хурлын гишүүдийг нөхөн томилох, Удирдах зөвлөлийн бүрэлдэхүүнд өөрчлөлт оруулах болон УИХ дээр үүсээд байгаа цаг үеийн асуудлуудыг хэлэлцэхээр товлоод буй. Эдгээрээс гадна МАН-ын нэр бүхий гишүүдэд хариуцлага тооцох асуудал ихээхэн анхаарал татаж байгаа юм.

Өмнө нь МАН-ын дарга У.Хүрэлсүх чуулганы индэр дээрээс "Намын бага хурлыг удахгүй зарлан хуралдуулж, нэр бүхий хүмүүстэй хариуцлага тооцно" гэж мэдэгдсэн. УИХ дахь МАН-ын бүлэг дотроо хуваагдаж, УИХ-ын чуулганы нэгдсэн хуралдаан сар шахам гацаанд орж буй энэ үед эрх баригч нам Бага хурлаа зарлан хуралдуулж байгаа нь онцлогтой.

Тиймээс ч МАН-ын Бага хурлын үеэр нэр бүхий хүмүүсийн намын гишүүнчлэлийг түдгэлзүүлэх асуудлыг танилцуулна гэх мэдээлэл байна. МАН-ын дүрмээр Бага хурлаар гишүүдэд хариуцлага тооцож болох зохицуулалт тодорхой тусч өгөөгүй. Гэвч нэр УИХ-ын дарга М.Энхболд, Н.Номтойбаяр, Ж.Мөнхбат тэргүүнтэй гишүүд болон 60 тэрбумын гэх хэрэгт нэр холбогдсон хотын фракцийн А.Ганбаатар, Ц.Сандуй нарын асуудлыг сөхөж ярина гэдгийг нам доторх эх сурвалжууд өгч байна.

Мөн Бага хурлын үеэр МАН-ын генсек Д.Амарбаясгалан, нарийн бичиг Ц.Бат-Энх нарт хариуцлага тооцох шаардлагыг М.Энхболдынхны талаас тавихаар зэхэж байгаа аж. МАН-ын дүрмийн заалтаас үүдэж, МАН-ын Ёсзүйн хороо болон Хяналтын хорооны дүгнэлтийг танилцуулж, анхан шатны үүр лүү нь чиглэл өгөх асуудал ч яригдсан байна.

Ерөнхийдөө Бага хурал нилээд ширүүн уур амьсгалтай явагдаж, дотооддоо асуудлаа хэлэлцэх төлөвтэй байгааг тодотгууштай. МАН-ын дарга У.Хүрэлсүх Бага хурлын үеэр ямар санал оруулах, гишүүддээ хэрхэн хариуцлага тооцох асуудлыг хөндөх нь ихээхэн анхаарал татаж байна.

Бага хурлын ирцийг сайн бүрдэнэ гэсэн мэдээллийг нам дотроос нь өгч буй. Хоёр талдаа санал хайрцаглах чиглэлд идэвхтэй ажиллаж, гарч болох эрсдлээ тооцож, тус тусдаа хуралдаацгаасан байна. Бага хурлын эхэнд хэвлэлийнхэн үүдний танхимаас сурвалжлага бэлтгэж болох ч хаалттай явуулах шийдэлд хүрээд байгаа юм.