ЗАСГИЙН ГАЗАР, ХОТЫН ДАРГЫГ ОГЦРУУЛАХ АСУУДЛУУДЫГ ХЭЛЭЛЦЭНЭ

Өнөөдөр хоёр чухал асуудлыг хэлэлцэж шийдвэрлэнэ. Тодруулбал, УИХ-ын байнгын хорооны хуралдаанаар байгуулагдаад яг нэг жил болж буй У.Хүрэлсүхийн тэргүүлж буй Засгийн газрыг огцруулах асуудлыг хэлэлцэж эхэлнэ. Мөн НИТХ-ын хуралдаанаар Хотын дарга Су.Батболдыг огцруулах асуудлыг хэлэлцэж шийдвэрлэх юм.

Өнгөрсөн даваа гаригт УИХ-ын гишүүн Д.Хаянхярваа 27 гишүүний гарын үсэгтэй Засгийн газрыг огцруулах бичгийг УИХ-д өргөн барьсан. Холбогдох хуулийн дагуу Засгийн газрыг огцруулах асуудлыг УИХ-аар 14 хоногийн дотор хэлэлцэж шийдвэрлэх учиртай. Энэ дагуу Төрийн байгуулалтын байнгын хорооны өнөөдрийн хуралдаанаар уг асуудлыг хэлэлцэнэ гэж тус байнгын хорооны дарга Д.Лүндээжанцан мэдэгдсэн билээ.

Тэрбээр энэ долоо хоногийн лхагва гаригийн байнгын хорооны хуралдаанаар "Би УИХ-ын болоод намын бүлгийн удирдлагатай ярьсан. Долоо хоногийн дотор байнгын хороо хэлэлцэнэ гэж заасан. Хуультай учир баасан гаригийн 15:00 цагаас өмнө манай байнгын хороог хуралдуулах бололцоо олгож өгөөч гэсэн хүсэлтийг УИХ-ын даргын зөвлөлд гаргасан" гэсэн билээ.

Өнөөдөр энэ дагуу байнгын хороо хуралдах товтой байна. Үүнээс өмнө МАН-ын бүлгийн хуралдаанаар уг асуудлыг хэлэлцэх юм. Тэгэхээр байнгын хорооны хуралдаанаас өмнө МАН-ын бүлгийн хуралдаж санал, дүгнэлтээ нэгтгэх нь. УИХ-ын гишүүн Д.Хаянхярваа Ерөнхий сайд У.Хүрэлсүхийг ЖДҮХС-аас зээл авсан сайд болон гишүүдтэйгээ хариуцлага тооцоогүй шударга бус ажилласан гэх гол үндэслэлээр огцруулахаар болсон билээ. Гэхдээ уг асуудлыг байнгын хороогоор хэлэлцэх шатанд УИХ-ын гишүүдийн ирц хүрэх эсэх талаар эргэлзээ байгаа юм. Учир нь УИХ-ын 40 гишүүн УИХ-ын дарга М.Энхболдыг огцрох хүртэл байнгын хороо, чуулганы хуралдаанд суухгүй гэж мэдэгдсэн. Үүнээс үүдэн өчигдрийн үдээс өмнөх чуулганы хуралдааны ирц бүрдэхгүй байсаар тарсан.

Өнөөдөр мөн НИТХ-ын тэргүүлэгчдийн хуралдаанаар Хотын дарга С.Батболдыг огцруулах асуудлыг хэлэлцэхээр товлоод байна. МАН-ын Удирдах зөвлөл энэ сарын 13-ны өдрийн хуралдаанаар Хотын дарга С.Батболдыг хариуцлагагүй ажилласан гэж дүгнээд огцруулах шийдвэрийг гаргасан. Хуулийн дагуу Хотын даргыг огцруулах асуудлыг 15 хоногийн дотор НИТХ-ын тэргүүлэгчдийн хуралдаанаар хэлэлцэж шийдвэрлэх дагуу уг асуудлыг өнөөдөр хэлэлцэхээр товлоод байна.