ЕРӨНХИЙ САЙДЫГ ОГЦРУУЛАХ АСУУДЛЫГ УИХ 15 ХОНОГИЙН ДОТОР ХЭЛЭЛЦЭНЭ

УИХ-ын гишүүн Д.Хаянхярваа нарын 27 гишүүн Ерөнхий сайдыг огцруулах бичигт гарын үсэг зурж өчигдөр орой УИХ-ын даргад өргөн мэдүүлсэн. Тиймээс хуулийн дагуу Ерөнхий сайдыг огцруулах асуудлыг УИХ-ын нэгдсэн чуулганаар хэлэлцэнэ. Хэрвээ гишүүдийн олонх Ерөнхий сайдыг огцруулахыг дэмжвэл Засгийн газар бүхэлдээ унана.

Үндсэн хуульд зааснаар УИХ Засгийн газрыг огцруула асуудлыг өөрөө санаачилсан болон Ерөнхийлөгчийн санал, Ерөнхий сайдын мэдэгдлийг хүлээн авснаас хойш 15 хоногийн дотор Засгийн газрыг огцруулах, эсэхийг хэлэлцэн шийдвэрлэнэ гэж заасан. Харин УИХ-ын Дэгийн тухай хуульд зааснаар Ерөнхий сайдыг огцруулахтай холбоотой асуудлыг УИХ-д өргөн барьснаас хойш долоо хоногийн дотор Төрийн байгуулалтын байнгын хороо хэлэлцэж, санал дүгнэлт гаргана гэж заасан. Чуулганы нэгдсэн хуралдаан Байнгын хорооны санал, дүгнэлт гарснаас хойш долоо хоногийн дотор хуралдаж, Байнгын хорооны дүгнэлтийг сонсож илээр санал хураалт явуулж гишүүдийн олонх дэмжсэн бол огцруулах тухай тогтоол батлагдсанд тооцно гэж заажээ. Тиймээс УИХ өнөөдрөөс хойш 15 хоногийн дотор Д.Хаянхярваа нарын гишүүдийн өргөн барьсан Ерөнхий сайдыг огцруулах асуудлыг хэлэлцэн шийдвэрлэх юм.

Монгол Улсын Их хурлын дэгийн тухай хуулийн 38 дугаар зүйлд "Ерөнхий сайд, Засгийн газар, Засгийн газрын гишүүнийг огцруулах асуудлыг хэлэлцэх журам" гэж заасан бөгөөд дараах дэгээр хэлэлцэх юм байна.

• 38.1.Ерөнхий сайд, Засгийн газар, Засгийн газрын гишүүнийг огцруулах саналыг Улсын Их Хуралд өргөн мэдүүлсэн бол Ерөнхий сайд, Засгийн газрыг огцруулах саналыг Төрийн байгуулалтын байнгын хороо, Засгийн газрын гишүүнийг огцруулах саналыг холбогдох Байнгын хороо 7 хоногийн дотор хуралдаанаараа хэлэлцэж санал, дүгнэлт гаргана.
• 38.2.Нэгдсэн хуралдаан Байнгын хорооны санал, дүгнэлт гарснаас хойш 7 хоногийн дотор хуралдаж Байнгын хорооны, хэрэв Цэц дүгнэлт гаргасан бол түүний дүгнэлтийг сонсож илээр санал хураалт явуулж гишүүдийн олонх дэмжсэн бол огцруулах тухай тогтоол батлагдсанд тооцно. /Энэ хэсэгт 2010 оны 12 дугаар сарын 30-ны өдрийн хуулиар өөрчлөлт оруулсан. /
• 38.3.Байнгын хорооны болон нэгдсэн хуралдаан дээр гишүүд асуулт асууж, үг хэлж болно.
• 38.4.Ерөнхий сайд, Засгийн газар, Засгийн газрын гишүүнийг огцруулах асуудлаар нам, эвслийн бүлэг санал, дүгнэлт гаргаж нэгдсэн хуралдаанд танилцуулж болно.
• 38.5.Ерөнхийлөгч, Ерөнхий сайд нэгдсэн хуралдаан дээр үг хэлж болно.
• 38.6.Засгийн газар өөрт нь итгэл хүлээлгэж байгаа эсэхийг илэрхийлж өгөхийг хүсч холбогдох тогтоолын төслийг Улсын Их Хуралд өргөн мэдүүлсэн бол энэ зүйлд заасан журмаар хэлэлцэн шийдвэрлэнэ