ЖДҮХС-ГИЙН ЗЭЭЛД НЭР ХОЛБОГДСОН ГИШҮҮДИЙГ ЁС ЗҮЙН ДЭД ХОРООГООР ХЭЛЭЛЦҮҮЛЭХЭЭР БОЛЛОО

УИХ-ын гишүүн Д.Хаянхярваа энэ сарын 12-нд ЖДҮХС-гийн зээлийн асуудалтай холбогдуулан УИХ-ын дарга М.Энхболд, Ерөнхий сайд, МАН-ын дарга У.Хүрэлсүх нар шаардлага хүргүүлсэн. УИХ-ын даргад дараахь шаардлагуудыг тавьсан юм.

• Жижиг, дунд үйлдвэрийг хөгжүүлэх сангаас өөрийн болон хамаарал бүхий этгээдийнхээ компанид зээл авч өгсөн, зуучилж нэр холбогдсон гишүүдийн ёс зүйн асуудлыг Ёс зүйн дэд хороогоор хэлэлцэн дүгнэлт гаргаж, ёс зүйн хариуцлага тооцох;
• Тус сан болон Засгийн газрын тусгай сангуудыг шалгах ажлын хэсгийг Төсвийн байнгын хорооноос яаралтай байгуулж, дүгнэлт гаргах;
• УИХ-аас томилогддог төрийн өндөр албан тушаалтнуудаас өөрийн хамаарал бүхий компанидаа ЖДҮ-ийг хөгжүүлэх сангаас зээл авч зуучилсан бол түүнд хариуцлага тооцож, огцруулах;

УИХ-ын дарга М.Энхболд дээрх шаардлагын дагуу өчигдөр Үндэсний аудитын газрын дарга Д.Хүрэлбаатарт ажлаа өгөх үүрэг өгсөн бол өнөөдөр ЖДҮХС-гийн зээлтэй холбоотой асуудалд нэр холбогдсон УИХ-ын гишүүдийг Ёс зүйн дэд хороогоор хэлэлцүүлэхийг тус дэд хорооны дарга С.Бямбацогтод үүрэг болголоо. Мөн энэ асуудалтай холбогдуулан Засгийн газрын тусгай сангуудыг шалгах ажлын хэсэн байгуулах үүргийг Төсвийн байнгын хорооны дарга Б.Чойжилсүрэнд өгөв.