ЭМНЭЛГИЙН ТОНОГ ТӨХӨӨРӨМЖИЙН СУРГАЛТ ЗОХИОН БАЙГУУЛАГДЛАА

Люксенбургийн Засгийн газар, Монгол улсын Засгийн газар, Нэгдсэн үндэсний байгууллагын Хүн амын сангийн санхүүжилтээр Монгол улсад эх, нярайн эрүүл мэндийн тусламж үйлчилгээнд шинэ техник, технологи нэвтрүүлэх замаар тусламж үйлчилгээг сайжруулах зорилготой төсөл хэрэгжиж байна.

Уг төслийн хүрээнд Эрүүл мэндийн яамны Эм, үйлдвэрлэл технологийн газар, Эрүүл мэндийн хөгжлийн төвийн Эм, эмнэлгийн тоног төхөөрөмжийн алба хамтран Нэгдсэн үндэстний байгууллагын Хүн амын сангийн дэмжлэгтэйгээр Улаанбаатар хотод 2018 оны 10 дугаар сарын 22-23-ны өдрүүдэд 2 хоногийн сургалтыг зохион байгууллаа.

Сургалтад удирдах 4 байгууллагын, эрүүл мэндийн яамны харьяа 15 байгууллагын 60, нийслэлийн эрүүл мэндийн газрын харьяа 22 байгууллагын 65, хувийн хэвшлийн 6 байгууллагын 10 нийт 47 байгууллагын 160 эмч, инженер, техникч, сувилагч нар оролцсон.

Эмнэлгийн тоног төхөөрөмжийн ашиглалт, аюулгүй ажиллагааны ерөнхий мэдлэгийг эмч, эмнэлгийн мэргэжилтэнд олгосон ба эмнэлгийн тоног төхөөрөмжийн инженер, техникчдэд эмнэлгийн тоног төхөөрөмжийн засвар үйлчилгээний онол дадлага хосолсон хичээл зааж, туршлага солилцсон. Мөн өвчтөний хяналтын монитор болон дефибрилляторийн хэвийн ажиллагааг шалгах шалгалт тохируулгын арга аргачлалыг заасан.