ХЭН ХЭН ЗЭЭЛЭЭ ТӨЛӨВ?

Нэр бүхий УИХ-ын гишүүд "Жижиг, дунд үйлдвэрлэлийг дэмжих сан"-гаас өөрийн болон хамаарал бүхий компаниараа дамжуулж зээл авсан тухай асуудал дуулиан тарьж байна. Тус санд өнөөдрийн байдлаар хичнээн компани хугацаанаас нь өмнө зээлээ буцаан төлж байгааг тодруулахад "Жижиг, дунд үйлдвэрлэлийг дэмжих сан"-гийнхан гадуур ажилтай гэдэг шалтгаанаар мэдээлэл өгөхөөс татгалзав. Зарим гишүүд би буруу зүйл хийгээгүй, уучлалт гуйх шаардлагагүй гэж гэдийж байгаа бол харин нөгөө хэсэг нь зээлээ төлөөд эхэлжээ. УИХ-ын гишүүн Ж.Энхбаяр хөрөнгө орлогынхоо мэдүүлэгт мэдүүлсэн "Газар буудай" ХХК-иар дамжуулж ЖДҮ-ийг дэмжих сангаас 950 сая төгрөг зээлсэн баримтыг хэвлэлээр дэлгэсэн. Ж.Энхбаяр гишүүн ард түмнээс уучлалт гуйж авсан зээлээ төлжээ.

Харин УИХ-ын гишүүн Н.Учралын хөрөнгө орлогын мэдүүлэгт байхгүй ч түүний аавынх нь компани болох "Хүннү" ХХК зээлээ 10-р сарын 29-нд төлжээ.

УИХ-ын гишүүн Н.Оюундарь уучлалт гуйхгүй гэж гүрийж байсан ч хүүгийнхээ "Red star club" гэдэг компаниар дамжуулж авсан зээл болох 950 сая төгрөгийг өчигдөр төлсөн гэж мэдэгдлээ.

Н.Өнөрцэцэг