ХХААХҮ-ИЙН ДАРААГИЙН САЙДАД Г.ТЭРБИШДАГВА, Д.ТОГТОХСҮРЭН, Л.ЭЛДЭВ-ОЧИР НАРЫН НЭР ЯРИГДАЖ БАЙНА

Аравдугаар сарын 31-ний өдөр УИХ дахь МАН-ын бүлэг ЖДҮ-ийг хөгжүүлэх сангаас зээл авсан гишүүдтэй хариуцлага тооцож, зээл авсан хүмүүсээр зээлийг нь эргүүлэн төлүүлж, хуулийн байгууллагаар шалгуулан, олон нийтээс уучлалт гуйлгах нь зүйтэй гэж үзсэн билээ. Тус бүлгийн хуралдааны үеэр Монгол Улсын Ерөнхий сайд У.Хүрэлсүх ХХААХҮ-ийн сайд Б.Батзоригт хариуцлага тооцож, сайдын суудлаас нь огцруулах асуудлыг өргөн барина гэдгээ мэдэгдсэн байдаг.

Товчхондоо У.Хүрэлсүхийн "шахалт"-аар Хүнс, хөдөө аж ахуй, хөнгөн үйлдвэрийн сайд Б.Батзориг өөрийн хүсэлтээр сайдынхаа албыг өгөхөө илэрхийлээд байгаа билээ. Б.Батзоригийн сайдын үүрэгт ажлаасаа чөлөөлөгдөх хүсэлтийг эхлээд Засгийн газар хэлэлцэн шийдвэрлэсний дараа УИХ-аар оруулж эцэслэн шийдэх юм. Эх сурвалжийн мэдээлж буйгаар, ирэх долоо хоногт Б.Батзоригийг огцруулах асуудлыг хэлэлцэх бололтой.

МАН дотор ХХААХҮ-ийн дараагийн сайдын "марафон" эхэлжээ. Тус намын зарим гишүүд энэ удаад давхар дээлгүй, мэргэжлийн хүнийг томилох ёстой гэж үзэж байгаа бол зарим нь эмэгтэйчүүдийн квотыг дэмжиж, энэ салбарт эмэгтэй хүн томилох ёстой гэсэн байр суурьтай байгаагаа илэрхийлж буй юм байна. Албан бусаар ХХААХҮ-ийн дараагийн сайдын квот МАН-ын 33-ын бүлгийнх, тиймээс ч дараагийн сайдын "өрсөлдөөн" 33-ын бүлэгт явагдах болов уу гэсэн таамаг байгаа ажээ.

ХХААХҮ-ийн дараагийн сайдад УИХ-ын гишүүн Л.Элдэв-Очир, Д.Тэрбишдагва, Д.Тогтохсүрэн, Б.Энх-Амгалан нарын нэр яригдаж буй юм байна. Д.Тэрбишдагвын хувьд 2002-2004 онд Хүнс, хөдөө аж ахуйн яамны дэд сайд, 2004-2007 онд Хүнс, хөдөө аж ахуйн яамны сайдын албан тушаалыг тус тус хашиж байсан туршлагатай юм. Л.Элдэв-Очирыг дараагийн сайд болно гэх яриа тарсан ч тэрээр сайд болохгүй гэдгээ намынхандаа хэлж, нэрээ татсан гэх мэдээлэл байна.

УИХ-ын гишүүн Б.Энх-Амгалангийн хувьд анх удаа сонгогдсон, олон улсын харилцааны мэргэжилтэй, нийслэлийн Иргэдийн хурлын төлөөлөгчөөр ажиллаж байжээ. УИХ-ын гишүүн Д.Тогтохсүрэнгийн хувьд анх удаа сонгогдсон, хуульч мэргэжилтэй, гэхдээ төрийн албанд олон жил зүтгэсэн нэгэн. Өвөрхангай аймгийн ИТХ-ын дарга, Засаг даргаар, төрийн албанд ажиллаж байсан туршлагатай аж.