АН-ЫН БҮЛГЭЭС ЧУУЛГАНЫ ХУРАЛДААНД ОРОЛЦОХГҮЙ ГЭДГЭЭ МЭДЭГДЛЭЭ

АН-ын бүлгээс УИХ, Засгийн газрыг хууль зөрчсөн үйлдлүүдээ таслан зогсоотол чуулган, байнгын хорооны хуралдаануудад оролцохгүй гэдгээ албан ёсоор мэдэгдэв.

Энэ талаар АН-ын бүлгийн дарга Д.Эрдэнэбат "АН-ын бүлгээс аравдугаар сарын 26-нд УИХ-ын дарга болон Ерөнхий сайдад албан шаардлага хүргүүлсэн. Шаардлагад тодорхой хариу ирүүлэхгүй бол өнөөдрөөс эхлэн чуулганы хуралдаанд оролцохгүй гэдгээ албан ёсоор мэдэгдсэн.

Өнөөдөр УИХ-ын даргаас Дэгийн тухай хуулийг баримталж хуралдах нь зүйтэй гэсэн албан бичгийг АН-д ирүүлсэн. Харин Засгийн газраас өнөөдрийг болтол ямар ч хариу ирүүлээгүй байна. Тийм учраас шаардлагыг дахин тавих шаардлагатай боллоо.

Нэгдүгээрт Ерөнхий сайд У.Хүрэлсүхийн Засгийн газрыг огцруулах асуудлыг дахин шаардаж байна. Хоёрдугаарт шударга ёсыг уландаа гишгэж өөрийн хамаарал бүхий компаниуддаа ЖДҮХС-аас зээл авсан гишүүдэд хариуцлага тооцохыг шаардъя. Гуравдугаарт энэ бүхнээс алдагдсан боломжийг иргэдэд буцаан олгох ажлыг УИХ, Засгийн газар яаралтай зохион байгуулах нь зүйтэй гэж үзэж байна.

Ирэх оны төсөв үндэсний эдийн засгийн аюулгүй байдал аж ахуйн бүх хэвшлийн болон хүн амын нийгмийн хөгжлийг хангах гэсэн Үндсэн хуулийн 5.1 дүгээр заалтыг ноцтой зөрчиж байгаа. Төрийн өндөр албан тушаалтнууд нь шударга ёс, тэгш байдал, хууль дээдлэх төрийн үйл ажиллагааны үндсэн зарчим байна гэсэн Үндсэн хуулийн 1.2 дугаар заалтыг ноцтой зөрчсөн байдлууд илэрсэн.

Тийм учраас эдгээр зөрчлийг арилгатал манай намын бүлэг чуулганы хуралдаанд хугацаагүйгээр оролцохгүй байхаа үүгээр мэдэгдэж байна. Зөрчлийг арилгасны дараа хуралдаанд оролцоно" гэлээ