ЕРӨНХИЙ САЙД АСАН С.БАЯР, С.БАТБОЛД НАРТ ЭРҮҮГИЙН ХЭРЭГ ҮҮСГЭН ШАЛГАЖ ЭХЭЛЖЭЭ

Сү.Батболдын оффшор бүсдэх хөрөнгийг шалгасан АТГ-ынхан гадны байгууллагаас тусламж гуйжээ.

УИХ-ын гишүүн, Тусгай хяналтын дэд хорооны дарга Сү.Батболдын төрсөн ах С.Бат-очир 2011 оны арваннэгдүгээр сарын 3-ны өдөр Британийн Виржинийн аралд "MCH finance limited", "MCH lubricants limited" гэх нэртэй аж ахуйн нэгжийг үүсгэн байгуулсныг албаныхан тодруулжээ. Тэрбээр "Дарханхан Холдинг", "Чингис Хаан Таун", "Харанга холдинг", "Харанга ресорс" ХХК-иудад хувьцаа эзэмшдэг бөгөөд захирлаар нь ажиллаж байсан аж. Ахынх нь данс, компаниудын ард Сү.Батболдыг байж болзошгүй гэж АТГ үзсэн учраас мөнгө угаах, терроризм санхүүжүүлэхтэй тэмцдэг олон улсын "Эгмонтын сүлжээ"-гээр /Egmont network/ дамжуулан Британийн Виржинийн арлуудын Санхүүгийн тагнуулын албатай хамтран ажиллах хүсэлт тавьж, шалгалтыг эхлүүлжээ.

С.Баярыг эрх мэдлээ урвуулан ашиглаж, мөнгө угаасан хэргээр шалгаж байгаа аж.

Харин ерөнхий сайд асан С.Баярыг 2007-2009 онд Ерөнхий сайдаар ажиллаж байхдаа хууль зөрчин, албан тушаалаа урвуулан ашиглаж, хувьдаа их хэмжээний хөрөнгөтэй болж, түүнийгээ оффшор бүсээр дамжуулан, гадаад улсад үл хөдлөх хөрөнгө худалдан авсан байж болзошгүй гэсэн үндэслэлээр шалгах болжээ. Түүний хөрөнгө орлогын мэдүүлгээс охин, эхнэрийнхээ нэр дээр АНУ-д худалдан авсан орон сууцнуудыг онцлон шалгаж байна. Шалгалтын явцад орон сууцны байршил, худалдсан, худалдан авсан аж ахуйн нэгж зэргийг тогтоох шаардлага тулгарсан тул Монголын АТГ, АНУ-ын Санхүүгийн тагнуулын албатай /FINCEN/ хамтран үл хөдлөх хөрөнгө худалдан авсан төлбөрийн эх үүсвэрийг шалгах, мөнгө угаасан сэжигтэй гүйлгээний мэдээллийн сангийн бүртгэлийг нь хянаж буй юм. Энэ үйл явц хараахан дуусаагүй АТГ-аас мэдээлсэн байна