Б.БАЯРАА: Ц.ЦОГЗОЛМАА САЙД АА, ГАНЦХАН ЖИЛИЙН НАСТАЙ СУРАХ БИЧИГТ 5-6 ТЭРБУМ ТӨГРӨГ ЗАРЦУУЛЖ, ХОГ ҮЙЛДВЭРЛЭХЭЭ БОЛЬ

Монголын багш нарын үйлдвэрчний эвлэлийн хороо, Монголын багш нарын нэгдэл төрийн бус байгууллага, АШУҮИС-ийн Тогтвортой хөгжил түр хороо хамтран өнөөдөр БСШУСЯ-ны урд талбайд эсэргүүцлийн жагсаал зохион байгууллаа.
Тэд, ЕБС-ийн сурагчдын ном сурах бичгийг үйлдвэрлэхэд 4-5 тэрбум төгрөг зарцуулдаг хэдий ч ганцхан жил хэрэглэгдээд хог дээр хаягддаг, мөн боловсрол болон эрүүл мэндийн салбарыг улс төрөөс ангид байлгах асуудлыг шийдэж өгөхийг БСШУС-ын сайд Ц.Цогзолмаагаас хүсч жагссан байна. Энэ талаар жагсаал зохион байгуулагч, Б.Баяраа "Бидний жагсаал бол боловсролын салбар эрүүл мэндийн салбарыг улс төрийн нөлөөллөөс ангид байлгах зорилготой. Их дээд сургуулийн удирдлага, захирлын албан тушаалд мэргэжлийн бус, салбараа мэдэхгүй, хүмүүсийг намын томилгоогоор томилж байна. Үүнийг Төрийн албаны зөвлөлийн хуулийн дагуу нээлттэй сонгон шалгаруулалт зарлаж, томилохыг шаардаж байна. Мөн боловсролын салбарыг дампууруулж байгаа сурах бичгийн бизнесийг эсэргүүцэж байна. Монгол Улс жил бүр 5-6 тэрбум төгрөгийн үнэтэй сурах бичиг хэвлүүлдэг. Энэ жагсаалд ашиглаж байгаа номнууд бол зөвхөн нэг ерөнхий боловсролын сургуулиас авч ирсэн сурах бичгүүд. Ганцхан жил хэрэглэгдээд дараа жил нь хэрэглэдэггүй. Нэг ч хэрэглээгүй боодлоороо актлагдсан номнууд хүртэл бий. Нийслэл болон хөдөө орон нутгийн бүх сургуулиуд дээр очоод асуугаад үзээрэй. Ийм номнууд олон бий. Монгол Улс цаас үйлдвэрлэдэггүй. Цаасыг валютаар авдаг. Дээр нь жил болгон татвар төлөгчдийн мөнгөөр нэг жил хэрэглэх настай чанаргүй сургалтын бодлого, сурах бичгийн технологийг зөрчсөн цаасан хог үйлдвэрлэж байна" гэв.

Жагсаал зохион байгуулагчид гурав хоногийн турш жагсаалаа үргэлжлүүлэх юм байна.