ААДАР БОРООНЫ УЛМААС ГУРВАН АЙМГИЙН 10 СУМАНД ЦАХИЛГААН ТАСРААД БАЙНА

Архангай аймгийн Өндөр-Улаан, Хашаат сумдын нутгаар өчигдөр/07.25/ 20:00 цагийн орчимд аадар бороо орж, хүчтэй салхи салхилжээ. Үүний улмаас Өндөр-Улаан, Тариат чиглэлийн "Эрдэнэт-Булган Цахилгаан дамжуулах сүлжээ" ТӨХК-ийн хариуцдаг 35 кВ-ын цахилгаан дамжуулах агаарын шугамын 10, Тариат сумын нутаг дэвсгэрт 5, Өндөр-Улаан сумын төвд нам хүчдэлийн сүлжээнд 0,4 кВ-ын 40 гаруй тулгуур багана унасан байна.

Дээрх гэмтлийн улмаас Архангай аймгийн 6, Хөвсгөл аймгийн 3, Завхан аймгийн 1, нийт гурван аймгийн 10 сум цахилгаангүй болоод байгаа аж.

Мөн 16 гэр усанд автаж нурсан, гэр нь нурсан 24 иргэнийг сумын эмнэлэгт түр байрлуулж, иргэн С /48 настай, эмэгтэй/, Д /80 настай, эрэгтэй/ нарын биеийн байдал хүндэвтэр эмчилгээ хийлгэж байгаа тухай мэдээллийг өчигдөр 21:30 цагт Онцгой байдлын ерөнхий газарт ирүүлжээ.

"Цахилгаан дамжуулах сүлжээ" ТӨХК-ийн Архангай аймгийн Жаргалант, Өвөрхангай, Хархорин, Цэцэрлэг салбарын нийт 5 бригадын 40 хүн, 7 техник хэрэгсэлтэйгээр, аймгийн Онцгой байдлын газрын 5 алба хаагч, 1 автомашинтай, нутгийн захиргааны байгууллагын 20 алба хаагч, 4 автомашинтай, нийт 25 хүн, 5 техник хэрэгсэлтэйгээр ажиллаж байна гэж Онцгой байдлын ерөнхий газраас мэдээллээ.