​М.ПОМПЕО ТУРКИЙН ГАДААД ХЭРГИЙН САЙДТАЙ ЯРИА ХЭЛЭЛЦЭЭ ХИЙНЭ

АНУ-ын Төрийн нарийн бичгийн дарга Майк Помпео Туркийн гадаад хэргийн сайд Мевлют Чавушоглутай өнөөдөр Вашингтон хотод яриа хэлэлцээ хийнэ. Сирийн Манбиж хотын асуудлаархи замын зургийг зөвшилцөх нь тус яриа хэлэлцээний гол сэдэв болох аж.

"Гадаад хэргийн сайд М.Чавушоглу АНУ-ын Төрийн нарийн бичгийн даргын урилгаар энэ сарын 3-4-нд АНУ-д айлчилна. Яриа хэлэлцээний үеэр талууд Сирийн Манбиж хотын асуудлаархи замын зургийг хэлэлцэхийн сацуу хоёр талын харилцаа, бүс нутаг болон олон улсын харилцан сонирхсон асуудлуудыг хэлэлцэх юм" гэж Туркийн ГХЯ мэдээлжээ.

Мөн айлчлалын үеэр Туркийн гадаад хэргийн сайд АНУ дахь туркийн болон лалын шашинтнуудын нийгэмлэгийн төлөөлөгчидтэй уулзах юм байна.

Курдын "Ардын өөрийгөө хамгаалах хүчин"-д АНУ дэмжлэг үзүүлсний улмаас Турк болон АНУ-ын харилцаа таагүй болоод байгаа юм. "Ардын өөрийгөө хамгаалах хүчин"-ийг Туркийн эрх баригчид террорист бүлэглэл гэж үздэг бол АНУ энэ хүчинд дэмжлэг үзүүлснээ "Лалын улс" террорист бүлэглэлтэй тэмцэж буй явдал гэж тайлбарладаг. АНУ амлалтаа биелүүлээгүй бөгөөд 2016 онд курдуудын бүлэглэлүүд Сирийн Манбиж хотыг Лалын улс бүлэглэлээс чөлөөлсний дараа Сирийн ардчилсан хүчнийг тус хотоос гаргаагүй хэмээн Турк улс АНУ-ыг удаа дараа буруутгаж байсан юм.