MH370 НИСЭХ ОНГОЦНЫ ХАЙГУУЛЫН АЖИЛ ӨНӨӨДӨР ДУУСЛАА

2014 оны гуравдугаар сарын 8-нд Малайзын нийслэлээс Бээжин хотыг чиглэн ниссэн Malaysia Airlines компанийн MH370 дугаартай онгоц сураггүй болж, одоо болтол ул мөр нь олдохгүй байгаа билээ.

Нийт 239 хүнтэй хамт сураггүй алга болсон онгоцны сүүлчийн эрлийн ажиллагаа өнөөдөр дуусч байна. Эрлийн ажиллагааг Энэтхэгийн далайд гүйцэтгэж байгаа АНУ-ын Техаст төвтэй Ocean Infinity компани анх 90 хоногийн хугацаатай ажиллаж эхэлсэн бол дараа нь хоёр удаа хугацаа сунгаж байв.

Австралийн Тээврийн сайд Майкл Маккормак дөрвөн жилийн турш үргэлжилсэн эрлийн ажиллагааг агаарын тээврийн түүхэнд хамгийн том, технологийн болон мэргэжилтнүүдийн чадварын хязгаарыг шалгасан арга хэмжээ байсныг онцолжээ.

Тэр сураггүй болсон 239 хүний ар гэр, ойр дотны хүмүүстэй сэтгэл зүрх нэг байгаагаа илэрхийлээд онгоц хэзээ нэг өдөр олдоно гэж итгэж байгааг мэдэгдэлдээ дурдсан байна.

Австрали, Малайз, Хятад улсууд 2016 онд хамтарсан эрлээ зогсоож, зөвхөн онгоцны байрлалыг харуулсан тодорхой баримт олдсон тохиолдолд эрлээ сэргээхээр тохиролцжээ. Хамтарсан эрлийн ажиллагааг Австралийн тал удирдаж, нийт $150 саяыг зарцуулан 120,000 км.кв талбайг самнасан юм. Харин үүнээс жилийн дараа Малайзын засгийн газар Ocean Infinity компанитай гэрээ байгуулж, Энэтхэгийн далайн өмнөд хэсэгт эрлийн ажиллагааг дахин явуулсан байна.

Энэ компани нь өнгөрсөн нэгдүгээр сараас хойш өнөөдрийг хүртэл хугацаанд 96,000 км.кв талбайтай далайн ёроолыг самнаж шалгажээ.