​БЕРЛИНД "МОНГОЛЫН КИНО ҮДЭШ" БОЛЛОО

ХБНГУ-ын Берлин хотын "Бабилон" театрт энэ сарын 25-нд "Монголын кино үдэш" арга хэмжээ боллоо. Монголын кино урлагийг хөгжүүлэх, олон улсад сурталчлан таниулах зорилготой зохион байгуулагдсан тус арга хэмжээнд кино урлаг судлаач, шүүмжлэгч, сонирхогчид өргөнөөр оролцож, найруулагч Д.Золбаярын найруулсан "Чингисийн хүүхдүүд" уран сайхны киног үзэж сонирхжээ. Монголын ахуй амьдрал, зан заншил, өв уламжлалыг тод томруунаар харуулсан "Чингисийн хүүхдүүд" уран сайхны кино нь "Оскар"-ын 90 дэх удаагийн наадмын гадаад хэл дээрх киноны төрөлд өрсөлдөхөөр нэр дэвшиж байсан бүтээл юм. Уг киноны продюссер Д.Дэлгэрцоо, зургийн дарга Г.Цогтгэрэл нар "Монголын кино үдэш" арга хэмжээнд оролцсон ба киноны дараах хэлэлцүүлгийн үеэр кино шүүмжлэгч, сонирхогчидтой санал сэтгэгдлээ хуваалцаж, хэлэлцүүлэг өрнүүллээ.