ХҮНИЙ СУДСЫГ 20 ЖИЛЭЭР ЗАЛУУЖУУЛЖ БОЛОХЫГ ЭРДЭМТЭД ТОГТООСОН БАЙНА

Митохондрт нөлөөлдөг үл исэлдүүлэгчүүдийг /антиоксидант/ хэрэглэснээр судсыг залуужуулж болно гэдгийг Колорадогийн их сургуулийн хэсэг эрдэмтэд тогтоожээ.Судлаачид 60-79 насны 20 хүнийг оролцуулан туршилт хийсэн байна. Тэдний тал нь буюу 10 хүн митохондрт нөлөөлөх MitoQ гэдэг үл исэлдүүлэгчийг хэрэглэсэн бол бусдад нь плацебо буюу хуурамч эм өгчээ.Ингээд сар хагасын дараа туршилтад оролцсон хүмүүсийн зүрх-судасны тогтолцоо нь хэрхэн ажиллаж буйг шалгасан байна. Үүний дараа туршилтад оролцогчдын байрыг сольж, туршилтыг давтан явуулжээ.Туршилтын эцсийн үр дүнг үзвэл, туршилтад оролцогчдын судсанд томоохон өөрчлөлт орж, 15-20 жилээр залуужсан байв. Тодруулбал, судасны үйл ажиллагаа нь 42 хувиар сайжирчээ. Ийм үзүүлэлт нь цаашдаа зүрхний өвчинд өртөх магадлалыг 13 хувиар бууруулах аж. "Энэ бол митохондрт нөлөөлөх үл исэлдүүлэгчийн судсанд нөлөөлөх байдлыг тодорхойлох зорилгоор хийсэн анхны клиник туршилт юм" хэмээн судалгааг удирдсан Мэтью Россман ярьж байна. Түүний хэлснээр, эмчилгээний ийм арга нь нас ахихтай холбоотой зүрх-судасны өвчлөлийн эрсдэлийг бууруулахад ихээхэн үр дүнтэй байх болно.