ДУЭЙН УЭЙД ИРЭХ УЛИРАЛ ҮРГЭЛЖЛҮҮЛЭН ТОГЛОХ ЭСЭХЭЭ ШИЙДЭЭГҮЙ

Миами Хит багийн хамгаалагч Дуэйн Уэйд 2003 оноос хойш НБЭ - д тасралтгүй 15 жил тоглож, олон ч амжилт үзүүлсэн. Зодог тайлсных нь дараа Миами Хит баг түүний дугаарыг мөнхлөх нь эргэлзээгүй. Цаашлаад алдрын танхимд ч нэр дэвших бүрэн боломжтой.

36 настай Уэйдийн хувьд мэргэжлийн спортын лигт тоглох хугацаа тийм ч их үлдээгүй. Тэрээр ирэх улиралд эргэн ирэх эсэхээ шийдээгүй байгаа ажээ.

Тэрээр саяхан ярилцлага өгөхдөө "Анх удаа л би дахин сагсан бөмбөг тоглох эсэхдээ эргэлзэж байна. Юутай ч ирэх жил үргэлжлүүлж тоглохоор шийдвэл Миами Хит багт л тоглоно. Ямар ч шийдвэр гаргасан би аз жаргалтай байх болно оо. Өөртөө болон багтаа хамгийн ашигтай шийдвэр гаргахыг л хүсч байна" гэж хэлжээ