БИТКОИНООС БОЛЖ ХОВСДУУЛАХ НЬ ИХЭСЧЭЭ

Биткоин валютын ханш өнгөрсөн оныхоос 10 дахин өсөж, дэлхийн томоохон хөрөнгө оруулагчдыг соронзон мэт татаж байна. Цахим мөнгийг их хэмжээгээр худалдаж авсан хүмүүс баяжиж байгаа ч нэг том асуудал үүсчээ. Хэрэв та биткоины сүлжээнд нэвтрэх нууц үгээ мартсан бол ямар ч оролдлого хийгээд нэмэргүй, бүх зүйл дууслаа гэсэн үг юм. Дахин тохируулах, дуудлага хийж холбогдох ямар ч сонголт байхгүй бөгөөд таны э-шуудангийн хаягаар нэвтрэх холбоосыг ганцхан удаа илгээнэ.

Тиймээс ОХУ-д нууц үгээ мартсан хүмүүст туслах зорилгоор "крипто ховсдолт" хэмээх үйлчилгээ нэвтэрсэн талаар "Wall Street Journal" мэдээлэв. Энэ үйлчилгээг санаачлагч Вероника Маримур "Би ховсдолын хүчээр хүмүүсийн оюун санааг түр хугацаагаар өөрчилж, шаардлагатай мэдээллүүдийг нь эргэн сануулж чадна. Гэхдээ тухайн хүнээс төлбөр авахаас өмнө ховсдож чадах эсэхээ урьдчилан шалгадаг" хэмээн ярьжээ. Харин зарим хүн үүнийг утгагүй зүйл хэмээн үзэж, супер компьютер ашиглан кибер халдлага үйлдэх гэж зүтгэж байгаа ажээ.