ХҮНСНИЙ БҮТЭЭГДЭХҮҮНИЙГ ТАМХИТАЙ АДИЛ ХАТУУ ХЯНАХ ЁСТОЙ

Хөгжингүй орнуудын хүн амын дунд хэт таргалалт ихэсч байгаа учир зарим хүнсний бүтээгдэхүүнийг тамхитай адил хатуу хянах ёстой гэдгийг мэргэжилтнүүд анхааруулж байна. Дэлхийн улс орнуудын Засгийн газар хүнсний үйлдвэрлэлд дээрх дүрмийг хэрэгжүүлж, дагаж мөрдөх ёстой гэнэ. Учир нь хэт таргалалт дэлхий нийтийн асуудал болж байна.

Хүүхэд, өсвөр насныхны хэт таргалалт сүүлийн 40 жилд арав дахин нэмэгдэж, илүүдэл жинтэй хүмүүсийн тооноос давах төлөвтэй байгааг судалгаа харуулав. Энэ нь давс, сахар ихтэй хүнс хэрэглэсэнтэй холбоотой юм. Тиймээс эхний ээлжинд эмнэлэг, сургууль зэрэг нийтийн хоолонд нийлүүлж буй хүнсний давс, сахарын хэмжээг тохируулах журмыг мөрдөх ёстой. Давс, сахарын хор тамхитай адил түвшинд хүрсэнийг эрдэмтэд сануулж байна.

Хэт таргалалт нь зүрх судасны өвчин, чихрийн шижин өвчин тусах эрсдэлийг нэмэгдүүлдэг бөгөөд дэлхий даяар чихрийн шижин өвчтэй хүмүүсийн тоо сүүлийн жилүүдэд ихээр нэмэгдэж байна. 1980 онд дэлхийн хүн амын 4.7 хувь нь чихрийн шижин өвчтэй байсан бол 2017 онд 8.5 хувь болж өсчээ.