ӨӨРТЭЙГӨӨ НАС ЧАЦУУ ХҮҮХЭД ТӨРҮҮЛЖЭЭ

Ийм гайхалтай хувь заяа хорвоод шинээр мэндэлсэн Эмма Врэн Гибсон охинд тохиожээ. Учир нь 1992 онд Америкийн иргэнээс хандивласан үр хөврөлийг хөлдөөж, хадгалан 25 жилийн дараа хүүхэд мэндэлсэн нь энэ ажээ. Эмма охин хамгийн олон жилийн дараа мэндэлсэн хүүхэд болж, түүхэнд бичигдлээ.

Сонирхолтой нь, охины ээж Тина Гибсон 1992 онд мэндэлсэн бөгөөд шинээр төрсөн охин нь өөртэй нь нас чацуу гэсэн үг юм. Тина эмч нар өөрт нь ийм удаан хадгалсан үр хөврөл суулгасныг мэдээд ихэд гайхан, баярласан гэнэ. Тэрээр "Би одоо дөнгөж 25 настай. Энэ үр хөврөл бид хоёр сайн найзууд ч байж болохоор байлаа шүү дээ. Гэхдээ би хүүхэдтэй л болохыг хүссэн болохоос ямар нэгэн шинэ дээд амжилт тогтоосон эсэх нь тийм ч чухал биш" хэмээн ярилцлагадаа дурджээ. Тинагийн нөхөр Бенжамин үргүй учраас хосууд хүүхэдтэй болох боломжгүй гэгдэж байсан юм. Харин одоо тэд шинжлэх ухааны ачаар ийм гайхалтай гүнжтэй болсноо "ид шид" хэмээн баярлаж байна.

Үр хөврөлийг удаан хугацаагаар хадгалахын тулд хөлдөөдөг учраас эмч нар ийм хүүхдийг "Цасан нярай" гэж нэрлэдэг аж.