ХЯТАДАД ХАР ТАМХИНЫ ХЭРЭГТНҮҮДИЙГ ОЛНЫ ӨМНӨ ЦААЗЛАВ

Хятадын Гуандон мужийн Люфэнг хотод хар тамхи, дээрэм, аллагын хэрэгт холбогдсон 10 ялтныг олны өмнө цаазалсан талаар эх сурвалжууд мэдээлэв. Ялын тогтоолыг олонд танилцуулах энэ өдрөөс дөрөв хоногийн өмнө тус мужийн дотоод хэвлэл мэдээллийн хэрэгслээр гэмт этгээдүүдийг олон нийтийн өмнө цаазлах тухай зарлан мэдээлж эхэлжээ. Хэрэгтнүүдийг төв цэнгэлдэх хүрээлэнд аваачихдаа хүн тус бүрийг хар нүдний шилтэй дөрвөн цагдаагаар харгалзуулсан байна. Тэднийг нэг нэгээр нь тавцан дээр гаргаж, ямар ял оноосныг олны өмнө уншин танилцуулсан ажээ. Энэ үеэр цугларсан олон мянган хүний дотор бага насны хүүхдүүд цөөнгүй байжээ.

Хятадын эрх баригчид өнгөрсөн долдугаар сараас хойш гурван удаа ялтнуудыг олны өмнө цаазлаад байгаа нь энэ юм. Энэ бусармаг, хүнлэг бус үйлдлийг олон нийт шүүмжилж, маргаан дагуулдаг хэдий ч Хятадын эрх баригчид гэмт хэрэг гаргахаас сэргийлж, сургамж өгч буй хэлбэр гэж өөрсдийгөө зөвтгөдөг ажээ.