ИРАКИЙН МИССИЙГ ЯАГААД ХӨНӨӨНӨ ГЭЖ СҮРДҮҮЛЭВ?

Өнгөрсөн сарын 26-нд Лос Анжелес хотноо болсон "Ертөнцийн мисс" тэмцээнд Ирак улс 45 жилийн дараа анх удаа оролцжээ. Иракийг төлөөлөн 27 настай Сара Идан тайзан дээр итгэл төгс, инээмсэглэн алхаж эх орноо сурталчилсан юм. Гэвч тэмцээний үеэр "Израилийн мисс" Адар Гандельсмантай хамт зураг авахуулснаас болоод нөхцөл байдал тэс өөрөөр эргэжээ. Түүнийг интернэт хэрэглэгчид зогсоо зайгүй дарамталж, амь насанд нь заналхийлж, сүрдүүлсэн тул тэмцээнээ цааш үргэлжлүүлэхэд хүндрэлтэй болсон байна. Удалгүй гэр бүлийн хамт эх орноосоо дүрвэхэд хүрчээ.

Учир нь Арабын ертөнцийнхөн түүний авахуулсан селфи зургийг доромжлол гэж үзэж байна. Сара Идан нь Ирак-Израилийн харилцаа таагүй гэдгийг мэдсээр байж Фэйсбүүк хуудсандаа зургаа тавьж, энх тайван, хайрыг дэмжиж буйгаа илэрхийлсэн гэнэ. Хоёр орон өдийг хүртэл албан ёсоор дипломат харилцаа тогтоогоогүй байдаг бөгөөд байнга дайсагналцдаг юм.