ЗАЛУУ ХАРАГДАХЫН ТУЛД ӨӨРТӨӨ 3,5 САЯ ЖИЛИЙН НАСТАЙ БАКТЕРИ ТАРИУЛЖЭЭ

Германы жүжигчин, 45 настай Мануш нь хөгшрөлтийг зогсоохын тулд өөрийгөө лабораторийн хулгана мэт эрсдэлтэй туршилтад оруулжээ. Тэрээр Сибирийн мөнх цэвдгээс олдсон 3,5 сая жилийн настай "Bacillus F" бактерийг тариулж, өөрийгөө наснаасаа залуу харагдах болсон хэмээн мэдэгдсэн байна. Харамсалтай нь энэхүү бактерийг 2015 онд илрүүлсэн Оросын судлаачид байгаль дээр байдаг бусад эсүүдтэй адилгүй гэж үзсэн ч залуужуулах увдистай гэдгийг нь огтхон ч баталж чадаагүй юм. Харин Мануш Москва дахь лабораториос бактерийн дээжийг авчран, өөрөө дур мэдэн гурван сарын турш долоо хоногт хоёр удаа судсандаа тариулжээ. Тиймээс түүнийг эрдэмтэд хүний биед сөрөг нөлөөгүй эсэх нь тодорхойгүй амьд организмыг цусандаа тариулж, хэтэрхий аюултай үйлдэл хийсэн гэж хатуу шүүмжлэв.

"Цаашид ямар сөрөг нөлөө гарахыг хэн ч мэдэхгүй. Гэхдээ миний арьс яг л нялх хүүхдийнх шиг болоод байгаа. Мэдээж би гэнэт 20 насаар залуужихгүй ч 80, 90 насалмаар байна" хэмээн Мануш ярьжээ. Тэрээр сүүлийн 20 гаруй жил арьсаа татуулах, хамраа өндөрсгүүлэх мэс засал хийлгэж, 50 мянган доллар зарцуулсан байна.