GPS ХЯНАГЧ, ХАМГААЛАЛТЫН КАМЕРТАЙ УХААЛАГ ХЭТЭВЧ ГАРЧЭЭ

АНУ-ын "Volterman" компани сэрүүлэг, GPS хянагч, камертай дэлхийн хамгийн аюулгүй хэтэвчийг зохион бүтээжээ. Ийм хэтэвчтэй байхад та халаасны хулгайч нараас бүрэн хамгаалж чадна.

Ухаалаг хэтэвчийг эзнээс нь өөр хүн нээж үзвэл камераар зургийг нь авч, мэдээлэл дамжуулах юм. Гаднаасаа бидний өдөр тутамдаа хэрэглэдэг энгийн хэтэвч мэт харагдах боловч 512MB багтаамжтай санах ой, пауэр банк, Wi-FI холболт ашиглах боломжтой. Түүнчлэн алсын зайнаас мэдрэх дохиоллын системтэй гэдгээрээ давуу талтай юм. Өөрөөр хэлбэл, хэтэвчин доторх банкны картынхаа мэдээллийг гар утсандаа хадгалах бөгөөд санаандгүйгээр гээж, хаях тохиолдолд сэрүүлэг дуугарч мэдээлэл өгнө. Гар утсаа гээсэн тохиолдолд мөн адил хэтэвчний сэрүүлэг дуугарна.

"Volterman" хэтэвчтэй байхад та дэлхийн хаана ч явсан бичиг баримт, жолооны үнэмлэх, картаа алдахгүй. Учир нь GPS хянагчаар байршлыг илрүүлэх ажээ.

Өмнө нь Япончууд үрэлгэн эзнээсээ зугтдаг "Living Wallet" нэртэй хэтэвчийг танилцуулж байв. "Zaim" нэртэй ухаалаг гар утасны програмыг ашиглан энэхүү түрийвчийг зохион бүтээсэн бөгөөд эзэн нь хүрэнгүүт "надад битгий хүр, туслаач" гэж хэлээд уйлдаг байна. Ингэснээр эзэндээ мөнгөө үр ашиггүй зүйлд зарцуулахгүй байхыг сануулж байгаа ажээ. Мөн хэтэвчээр э-шуудан руугаа нэвтэрч орлого, зарлагаа тооцох боломжтой.