ЗАМ ТЭЭВРИЙН ОСОЛ, ГЭМТЭЛ 2020 ОН ХҮРТЭЛ 3 ДАХИН НЭМЭГДЭХ МАГАДЛАЛТАЙ БАЙГАА АЖ

Дэлхий нийтийн анхаарлын төвд байгаа хүн амын эрүүл мэндийн тулгамдсан асуудлын нэг нь зам тээврийн осол гэмтэл юм. Манай улсад сүүлийн 10 жилийн байдлаар зам тээврийн осол 6.6 дахин өсч, нийт хүлээн авсан дуудлагын 94.4 хувь нь нийслэлд, 5.6 хувь нь орон нутагт бүртгэгдээд байна. Уг өсөлтийг энгийн арифметик тооцооллын аргаар бодож үзэхэд 2020 он хүртэл зам тээврийн ослын дуудлага, мэдээлэл 2015 оноос 3,9 дахин, бүртгэгдсэн зам тээврийн осол 3 дахин өсөх магадлалтай байгааг харуулжээ.

Тэгвэл зам тээврийн ослын үед учрах гэмтлээс урьдчилан сэргийлэх нэн ач холбогдолтой хэрэгсэл бол хамгаалах бүс, хамгаалалтын малгай юм. Энэ хүрээнд "Блумберг филантропи" болон хамтрагч байгууллагуудтай нэгдэн ДЭМБ-аас хүн амыг халдварт бус өвчин, осол гэмтлээс сэргийлэхэд үр дүнтэй 10 арга хэмжээний нэг хэмээн хүлээн зөвшөөрсөн "Хамгаалах бүс, хамгаалах малгайн хэрэглээг хэвшүүлснээр зам, тээврийн аюулгүй байдлыг сайжруулах" төслийн оролцогч талуудын уулзалт 2017 оны 11 дүгээр сарын 7-8-ны өдрүүдэд 09:00-17:00 цагт "Блю скай" зочид буудлын "Топаз" танхимд болох гэж байна.

Нийслэлийн Засаг дарга бөгөөд Улаанбаатар хотын захирагч С.Батболд, Нийслэлийн Эрүүл мэндийн газрын санаачилгаар халдварт бус өвчин болон осол гэмтлийг үүсгэх эрсдэлт хүчин зүйлсийг бууруулах, нотолгоонд суурилсан арга хэмжээг авч иргэдийнхээ амьдрах болон ажиллах орчныг сайжруулах зорилго бүхий "Эрүүл хотуудын нөхөрлөл"-д Улаанбаатар хот 2017 оны 05 дугаар сарын 16-ны өдөр нэгдсэн билээ.