ДӨРВӨН УЛИРЛЫН ДУГУЙ МАНАЙ ОРОН ШААРДЛАГА ХАНГАХГҮЙ

Хүйтний ам наашилж, хүн бүр дор бүрнээ өвөлдөө бэлтгэж байна. Дүн өвлийг өнтэй, өнгөтэй давахын тулд идэш тэжээл, нүүрс түлээ, дулаан хувцсаа базаахаас гадна автомашиныхаа тос тосолгоо, эд ангиудыг ч солих шаардлагатай юм.

Өвлийн эхэн сард автомашин хэрэглэгчдийн дунд үүсдэг нэг асуудал бол яах аргагүй хальтирдаггүй өвлийн дугуй гэж хэлж болно. Замын нөхцөл хальтиргаа гулгаатай хүйтний улиралд нийслэлийн авто зам дээр ослын тоо эрс нэмэгддэг. Энэ нь нэг талаар автомашиндаа өвлийн дугуй зөв сонгож тавиагүй жолооч нарын буруугаас болох нь бий. Замын цагдаагийн албанаас зөвлөмж байдлаар л мэдээлэл өгдөг болохоос зуны дугуйтай байна гэж торгох үндэслэл байхгүй байгаа юм. Ер нь өвлийн улиралд арзгар хээтэй, зөөлөн дугуй тавих ёстой. Учир нь зуны дугуйтай өвөл явахад тоормослоход хальтирдаг төдийгүй хөлддөг байна.

Замын нөхцөл байдал нь тээврийн хэрэгслийн ашиглалтанд төдийгүй жолоочийн бие, сэтгэл зүйд асар их ачаалал өгч байдаг. Эвдрэл тэгш биш байдал өгсүүр уруу халтиргаа зэрэг хүндрэлтэй нөхцөлүүд нь хөдөлгөөнд оролцох үеийн нөхцөл байдлыг, үнэлэж дүгнэхэд ихээхэн хүндрэлтэй байдаг байна.

Халтиргаатай нөхцөлд тээврийн хэрэгслийн тоормозны зам 3-4 дахин ихсэж мөстсөн нөхцөлд автомашины дугуй замтай барьцалдах хүч 5 дахин багасдаг гэж байгаа юм. Жишээлбэл: 50 км/ц хурдтай явж байсан автомашины тоормозны зам тээш хуурай асфалтан замд 20 метр байсан бол нойтон замд 50 метр, цастайд 60 метр мөстсөн бол 120 метр болж тус тус өсдөг. Хальтиргаатай замд аюулгүй байдлыг хангахад дугуй хамгийн чухал үүрэг гүйцэтгэнэ. Тийм учираас зам тээврийн ослоос урьдчилан сэргийлэхийн тулд зайлшгүй өвлийн дугуй солих шаардлагатай.