НИЙСЛЭЛИЙН УСААР ХАНГАХ АЛБАНЫ УДИРДАХ БҮРЭЛДЭХҮҮНИЙ СУРГАЛТЫГ ЗОХИОН БАЙГУУЛАВ

Нийслэлийн Засаг даргын 2017 оны А/11 дүгээр захирамжийг хэрэгжүүлэх ажлын хүрээнд Нийслэлийн Онцгой байдлын газрын даргын баталсан удирдамжийн дагуу 2017 оны 10 дугаар сарын 30-ны өдөр Нийслэлийн Гамшгаас хамгаалах усаар хангах албаны удирдах бүрэлдэхүүний сургалтыг Хан-Уул дүүргийн 3 дугаар хорооны нутаг дэвсгэрт байрлах Ус сувгийн удирдах газрын "Сургалт судалганы төв"-д 6 цагийн багтаамжтайгаар 2 үе шаттайгаар зохион явуулав.

Сургалтанд Ус сувгийн удирдах газар ОНӨҮГ, түүний харьяа байгууллагуудын штабын бүрэлдэхүүний нийт 24 хүн хамрагдсан байна.

Нийслэлийн Онцгой байдлын газрын дэд дарга, хурандаа А.Дашням, ахлах мэргэжилтэн хошууч, Ц.Эрдэнэчимэг, ахлах мэргэжилтэн ахмад Э.Батбаяр нар Монгол Улсын "Гамшгаас хамгаалах тухай", "Галын аюулгүй байдлын тухай" хууль болон бусад заавар, журмыг хэрэгжүүлэх, албаны "Гамшгаас хамгаалах төлөвлөгөө"-ний хэрэгжилт, гамшгаас хамгаалах албаны бэлэн байдлыг үнэлэх, мэдлэг, чадварыг нэмэгдүүлэх зорилгоор гамшгаас урьдчилан сэргийлэх, аврах, хор уршгийг арилгах, хойшлуулшгүй сэргээн босгох арга хэмжээг зохион байгуулах зэрэг сэдвүүдээр нийслэлийн Гамшгаас хамгаалах усаар хангах албаны удирдлагын үүрэг, Тусгай зориулалтын мэргэжлийн ангийн бүрэлдэхүүний гүйцэтгэх үүрэг, бусад албадтай харилцан ажиллагааг хэрхэн зохион байгуулах талаар мэдээлэл өгсөн.

Мөн Усаар хангах албаны удирдах бүрэлдэхүүнийг газар хөдлөлтийн улмаас Улаанбаатар хотын цэвэр усан хангамжийн шугам сүлжээний 70 орчим хувь нь гэмтэж, 8000 иргэнийг нүүлгэн шилжүүлж хуарагнуулсан, их хэмжээний ойн түймэр гарсан тухай 3 цагийн байдалд ажиллуулан дадлага олголоо гэж нийслэлийн Онцгой байдлын газраас мэдээллээ.