АМЕРИКТ ХАЛДЛАГАД ӨРТӨН АМИА АЛДСАН Т.БАЯРСАЙХАНЫ АР ГЭРТ ЭМГЭНЭЛ ИЛЭРХИЙЛЭВ

АНУ-ын Мэрилэнд мужид 2017 оны 10 дугаар сарын 18-ны өдөр буюу өчигдөр америкийн иргэн хамт ажиллаж байсан 5 хүнийг буудаж, 3 нь нас барсан хэрэг гарсан. Олон нийтийн хэвлэл, мэдээллийн хэрэгслээр нас барсан иргэдийн дунд монгол иргэн байсан гэсэн мэдээллийн дагуу Гадаад харилцааны яамнаас холбогдох арга хэмжээ авч, ар гэртэй нь холбоо тогтоосон болно.

Нас барсан иргэний ар гэрийн хүсэлтийг хүндэтгэн дэлгэрэнгүй мэдээлэл өгөх боломжгүй болохыг үүгээр мэдэгдэж байна.

Гадаад харилцааны яам Вашингтон дахь ЭСЯ-аараа дамжуулан талийгаачийн ар гэрт шаардлагатай тусламж дэмжлэгийг үзүүлэх болно гэж Гадаад харилцааны яамны консулын газраас мэдээллээ.

Тэгвэл УИХ-ын дарга М.Энхболд өөрийн цахим хуудсаараа дамжуулан

"АНУ-ын Мэрилэнд мужид өчигдөр өглөө болсон халдлагад монгол хүн амиа алдсан харамсалтай хэрэг гарлаа. Уг мэдээллийг нягталж, холбогдох арга хэмжээ авч ажиллахыг ГХЯ-нд үүрэг болголоо .

Гэмт этгээд 5 хүнийг буудсанаас 3 нь нас баржээ. Амиа алдсан хүмүүсийн 1 нь 53 настай Түдэв овогтой Баярсайхан гэдэг монгол хүн байсан байна. Талийгаачийн ар гэр, төрөл төрөгсдөд гүн эмгэнэл илэрхийлье." хэмээн бичжээ.