PC ТОГЛОХЫН ТУЛД БҮЛЭГЛЭН ХУЛГАЙ ХИЙДЭГ БАЙСАН ЭТГЭЭДҮҮДИЙГ БАРИВЧИЛЖЭЭ

Бусдын үнэ цэнэтэй эд зүйлийг хулгайлан зарж борлуулаад олсон мөнгөөрөө компьютер тоглоом тоглодог бүлэг этгээдийг цагдаагийн алба хаагчид илрүүлэн шалгаж эхэлжээ.

Уг этгээдүүдийг Хан-Уул дүүргийн нутаг дэвсгэрээс хулгайлсан мөнгөн аяганы бүрмэл мөнгийг нь салгаж, ченжид худалдахаар завдаж байхад нь Чингэлтэй дүүргийн нутаг дэвсгэрээс баривчилжээ. Уг хэргийг 19-22 настай, эрэгтэй Т, Т, А нар бүлэглэн үйлдсэн байна. Тэд “Зурагт, нөүтбүүк, мөнгөн аяга зэрэг эд зүйл хулгайлдаг байсан аж. Хулгайлсан эд зүйлээ зараад мөнгөөр нь компьютер тоглоомын газар хонон, өнжин тоглож, хоол унд авч идээд л дуусгачихдаг" гэж ярьсан байна. Тус этгээдүүд нь Сонгинохайрхан дүүрэгт 14, Сүхбаатар дүүрэгт 12, Хан-Уул дүүрэгт зургаан удаа хулгайлах гэмт хэрэг үйлдсэн бөгөөд эдгээр дүүргийн цагдаагийн хэлтэст шалгагдаж байна. Харин Т,Т,А нарт хувийн батлан даалтад гаргах таслан сэргийлэх арга хэмжээ авч байгаа нь гэмт этгээдүүд гадуур сэлгүүцэн, дахин гэмт хэрэг үйлдэх нөхцөл шалтгаан болоод байгаа аж. Учир нь цагдаагийн байгууллагаас хулгайлах гэмт хэрэгтэй тэмцэх, урьдчилан сэргийлэх, таслан зогсоох чиглэлээр тодорхой үйл ажиллагаа, арга хэмжээнүүдийг явуулж байгаа боловч өмнө нь олон үйлдэлтэй этгээдүүдэд таслан сэргийлэх арга хэмжээг зөв оновчтой авахгүй байгаагаас тэд дахин хулгайн гэмт хэрэг үйлдэж, иргэдэд хохирол учруулсаар байна.