ХХБ-Д 2016 ОНЫ ХОЁРДУГААР ЭЭЛЖЭЭР ТАТАГДСАН ЦЭРГҮҮД ХАЛАГДЛАА

Хил хамгаалах ерөнхий газрын даргын тушаал мөн хилийн цэргийн штабын даргын гаргасан захирамжын дагуу Хил хамгаалах байгууллагын хэмжээнд 2016 оны хоёрдугаар ээлжийн хугацаат цэргийн алба хаагчдыг халах, 2017 оны хоёрдугаар ээлжийн шинэ дайчдыг татах ажиллагаа Хилийн 0151 дүгээр ангийн цэрэг халах, татах дамжин өнгөрүүлэх төвд үргэлжилж байна. Өнөөдөр цэрэг татах, халах төвд Улаанбаатар хотын дүүргүүд болон Орхон, Сэлэнгэ, Дархан-Уул , Төв, Архангай аймгаас татагдсан хилийн 8 отрядын дайчид өргөсөн тангарагтаа үнэнч байж, үүргээ амжилттай биелүүлжээ.

Хил хамгаалах байгууллагаас бие бүрэлдэхүүнтэй явуулах сургалтын хөтөлбөрийг баталж, онолын болон дадлагын сургалтыг бүтэн жилийн турш зохион байгуулдаг. Тухайлбал, хууль эрх зүй, хилийн алба, боомтын хамгаалалт, галын бэлтгэл, цэргийн дүрэм, биеийн тамир, тусгай бэлтгэл гэх мэтчилэн нийт 8 төрлийн хичээлийг нарийвчилсан төлөвлөгөөний дагуу үндсэн бие бүрэлдэхүүн болон гэрээт, хугацаат цэргийн албан хаагчдад зааж сургажээ

Хилийн цэрэгт алба хаасан дайчдын хувьд байнгын харуул манаа, бэлтгэл сургуулилтыг жилийн хугацаанд тасралтгүй хийж, эх орныхоо торгон хил дээр үүрэг гүйцэтгэснээрээ давуу талтай байдаг. Энэ нь халагдаж буй дайчдын бэлтгэл сургуулилт,бие хаа, ур чадвараас харагдаж байсан юм.Мөн онолын хичээлийг бататган олон удаагийн дадлага сургуулилтыг хийж, цэргийн хүнд байх ёстой жинхэнэ ур чадварыгсуулгаж өгсөнтөй холбоотойг ХХБ-ын офицер,ахлагч нар хэлж байсан юм.